ແຈ້ງການ ໂຈະການເຂົ້າອອກຊົ່ວຄາວ ແຂວງໄຊຍະບູລີ

ຮອງເຈົ້າແຂວງ, ຫົວຫນ້າຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດ COVID-19 ຂັ້ນແຂວງ ຂໍຖືເປັນກຽດແຈ້ງມາຍັງບັນດາທ່ານຊາບວ່າ: ສະພາບການລະບາດຂອງພະຍາດ COVID-19 ພາຍໃນປະເທດໄດ້ເພີ່ມຂື້ນ ຕາມການລາຍງານຄັ້ງວັນທີ 21 ເມສາ 2021 ຂອງຄະນະສະເພາະກິດ ຂັ້ນສູນກາງ ປະຈຸບັນ ສປປ ລາວ ເກີດມີການລະບາດໃນຊຸມຊົນ ໄດ້ມີຜູ້ຕິດເຊື້ອ ຈໍານວນ 28 ຄົນ ໃນນັ້ນມີຜູ້ ຕິດເຊື້ອຈາກນະຄອນຫຼວງວຽງຈັນ 26 ຄົນ, ຜູ້ຕິດເຊື້ອຈາກແຂວງຈໍາປາສັກ 2 ຄົນ ແລະ ຈັງຫວັດອ້ອມຂ້າງແຂວງ ຝ່າຍຣາຊະອານາຈັກໄທມີທ່າອ່ຽງເພີ່ມຂຶ້ນຢ່າງໄວ. ສະນັ້ນ, ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດ ຂອງ ພະຍາດ COVID-19 ຄະນະສະເພາະກິດຂັ້ນແຂວງ ອອກແຈ້ງການ ດັ່ງນີ້:

1. ໃຫ້ໂຈະການເຂົ້າ-ອອກພາຍໃນແຂວງ, ການເຂົ້າ-ອອກດ່ານສາກົນ ແລະ ດ່ານປະເພນີ ຂອງຄົນ ແລະ ສິນຄ້າທີ່ບໍ່ຈໍາເປັນ ໃນລະຫວ່າງວັນທີ 22 ເມສາ ຫາ 5 ພຶດສະພາ 2021, ຍົກເວັ້ນລົດຂົນສົ່ງສິນຄ້າທີ່ມີຄວາມຈໍາເປັນໃນການດໍາລົງຊີວິດຂອງປະຊາຊົນ, ນ້ໍາມັນເຊື້ອໄຟ, ເຄື່ອງຈັກ, ອຸປະກອນຮັບໃຊ້ໂຄງການລົງທຶນພາຍໃນແຂວງ ແລະ ການສົ່ງອອກສິນຄ້າຜະລິດຕະພັນກະສິກໍາແມ່ນສາມາດສົ່ງອອກ ແລະ ນໍາເຂົ້າ ໄດ້ ແຕ່ຕ້ອງໃຫ້ຜູ້ຂັບລົດຂົນສົ່ງສິນຄ້າ ມີໃບຢັ້ງຢືນການສັກວັກຊິນປ້ອງກັນພະຍາດ COVID-19 ຄົບ 2 ເຂັ້ມ ພ້ອມທັງປະຕິບັດຕາມລະບຽບການປ້ອງກັນພະຍາດ COVID-19 ຢ່າງເຂັ້ມງວດ, ກໍລະນີຜູ້ຂັບລົດ ສິນຄ້າໄປ-ກັບພາຍໃນມື້ດຽວແມ່ນຈະບໍ່ໄດ້ເກັບຕົວຢ່າງກວດຫາເຊື້ອ ແລະ ກັກຕົວ 14 ວັນ, ແຕ່ຖ້າກາຍ 1 ວັນ ແມ່ນຈະໄດ້ປະຕິບັດຕາມລະບຽບຂອງຄະນະສະເພາະກິດຂັ້ນສູນກາງ ແລະ ຂັ້ນແຂວງວາງອອກ.

2. ມອບໃຫ້ກໍາລັງປ້ອງກັນຊາດ ສົມທົບກັບກໍາລັງປ້ອງກັນຄວາມສະຫງົບ ຕັ້ງຈຸດກວດກາຄົນເຂົ້າ-ອອກ, ກວດຂັນຕາມຈຸດຜ່ານແດນພາຍໃນເມືອງຢ່າງເຄັ່ງຄັດ, ເອົາໃຈໃສ່ກວດກາຢ່າງເຂັ້ມງວດຕາມຊາຍແດນ ເພື່ອປ້ອງກັນການລັກລອບເຂົ້າມາແບບບໍ່ຖືກຕ້ອງ ແລະ ມີມາດຕະການຕໍ່ແຮງງານທີ່ລັກລອບເຂົ້າມາແບບບໍ່ຖືກຕ້ອງຕາມລະບຽບການ

3. ສໍາລັບບຸກຄົນໃດທີ່ສໍາຜັດໃກ້ຊິດ ຫຼື ມີປະຫວັດການເດີນທາງໄປຍັງສະຖານທີ່ ທີ່ມີຄວາມສ່ຽງທີ່ທາງຄະນະສະເພາະກິດຂັ້ນສູນກາງໄດ້ຖະແຫຼງມາໃນວັນທີ 21 ເມສາ 2021 ນັ້ນ, ໃຫ້ຄະນະສະເພາະກິດຂັ້ນເມືອງສົມທົບກັບອໍານາດການປົກຄອງບ້ານນໍາຕົວຜູ້ກ່ຽວແຍກອອກຈາກຄົນອ້ອມຂ້າງ ຈົນຄົບ 14 ວັນ.

4. ຫ້າມບຸກຄົນເດີນທາງໄປເຂດທີ່ມີການຕິດເຊື້ອ ຫຼື ເຂດທີ່ມີຄວາມສ່ຽງ ຍົກເວັ້ນຜູ້ທີ່ໄດ້ຮັບອະນຸຍາດຈາກອົງການທ້ອງຖິ່ນທີ່ກ່ຽວຂ້ອງ ຍ້ອນເຫດຜົນຈໍາເປັນ ເຊັ່ນ: ຂົນສົ່ງສິນຄ້າ, ໄປໂຮງຫມໍ ແຕ່ໃຫ້ຂະແຫນງສາ.ທາລະນະສຸກ ແລະ ເຈົ້າຫນ້າທີ່ກ່ຽວຂ້ອງອະນຸຍາດ.

5. ຫ້າມກັກຕຸນ ແລະ ຂື້ນລາຄາສິນຄ້າ ທີ່ຈໍາເປັນຕໍ່ການກັ້ນການລະບາດ, ການອຸປະໂພກ ແລະ ບໍລິ ໂພກ.ເປັນຕົ້ນ ຜ້າປິດປາກ-ດັງ, ນ້ໍາຢາລ້າງມື, ຢາປົວພະຍາດ, ອຸປະກອນການແພດ, ເຂົ້າ, ອາຫານ, ນ້ໍາດື່ມ ແລະ ອື່ນໆ, ໃຫ້ພະແນກອຸດສາຫະກໍາ ແລະ ການຄ້າແຂວງ ເອົາໃຈໃສ່ເປັນພິເສດໃນການຕິດຕາມ ກວດກາ ແລະ ຄຸ້ມຄອງລາຄາສິນຄ້າ, ພ້ອມກັນນີ້ ກໍ່ໃຫ້ສົມທົບກັບເຈົ້າຫນ້າທີ່ຕໍາຫຼວດ ດໍາເນີນມາດຕະການປັບໄຫມ ແລະ ລົງໂທດ ຕໍ່ຜູ້ລະເມີດຢ່າງເຂັ້ມງວດ.

6. ຫ້າມໂຄສະນາ, ເຜີຍແຜ່ ແລະ ສົ່ງຕໍ່ຂໍ້ມູນຂ່າວສານ ທີ່ບໍ່ມີມູນຄວາມຈິງ ໃນຮູບແບບໃດຫນຶ່ງ ຜ່ານສື່ຕ່າງໆຊຶ່ງເຮັດໃຫ້ມີຄວາມເຂົ້າໃຈຜິດ, ສ້າງຄວາມແຕກຕຶ່ນ ແລະ ສົ່ງຜົນກະທົບໃນທາງລົບຕໍ່ສັງຄົມ. ໃຫ້ເຈົ້າຫນ້າທີ່ກ່ຽວຂ້ອງເອົາໃຈໃສ່ຕິດຕາມ ແລະ ດໍາເນີນມາດຕະການຕໍ່ຜູ້ລະເມີດຢ່າງເຂັ້ມງວດ.

7. ໃຫ້ທຸກຄົນໃຊ້ຜ້າອັດປາກອັດດັງໃນເວລາຢູ່ໃນຊຸມຊົນ, ໃນເວລາອອກຈາກເຮືອນ ໄປ-ມາ ຢ່າງເຄັ່ງຄັດ.

8. ການຂົນສົ່ງສິນຄ້າຜ່ານດ່ານຊາຍແດນເຂົ້າມາ ສປປ ລາວ: ໃຫ້ມີການປ່ຽນຖ່າຍໃນຈຸດຜ່ານແດນ ໂດຍສະເພາະ ແມ່ນຜູ້ຂັບລົດ ພ້ອມທັງອະນາໄມລົດດ້ວຍການຊິດພົ່ນຢາຂ້າເຊື້ອ ຫລື ປ່ຽນລົດ ພ້ອມທັງຜູ້ຂັບລົດ.

9. ມອບໃຫ້ພະແນກໂຍທາທິການ ແລະ ຂົນສົ່ງແຂວງ ອອກແຈ້ງການໂຈະຊົ່ວຄາວການຂົນສົ່ງໂດຍສານຈາກແຂວງໄຊຍະບູລີໄປຕ່າງແຂວງ ແລະ ຈາກຕ່າງແຂວງເຂົ້າມາ ”

10, ຫ້າມນໍາເຂົ້າສິນຄ້າປະເພດອາຫານທະເລສົດ ແລະ ອາຫານແຊ່ແຂງທຸກປະເພດ ທີ່ນໍາຂົ້າມາຈາກຣາຊະ

ອານາຈັກໄທ.

11. ບໍ່ອະນຸຍາດໃຫ້ຈັດງານຄອນເສີດ, ງານລາຕີສະໂມສອນ ແລະ ຕ້ອງປະຕິບັດມາດຕະການປ້ອງກັນການແຜ່ລະບາດຂອງພະຍາດ COVID-19 ທີ່ຄະນະສະເພາະກິດວາງອອກຢ່າງເຂັ້ມງວດ, ສໍາລັບງານດອງ ແລະ ງານ,ຕ່າງໆ ກໍ່ໃຫ້ຈັດແບບກະທັດຮັດ ແລະ ປະຢັດມັດທະຍັດ ຕາມຮີດຄອງປະເພນີອັນດີງາມຂອງລາວເຮົາ.

12. ໃຫ້ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ ສົມທົບກັບພາກສ່ວນກ່ຽວຂ້ອງແຕ່ລະຂັ້ນເພີ່ມທະວີການໂຄສະນາເຜີຍແຜ່ ໃຫ້ທຸກຄົນໃນສັງຄົມທຸກຄົນຕ້ອງຍົກສູງສະຕິຄວາມຮັບຜິດຊອບໃນ ການຈັດຕັ້ງປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດCOVID-19 ຢ່າງເປັນເຈົ້າການຮ່ວມກັນ.

13, ໃຫ້ອົງການປົກຄອງເມືອງ ເພີ່ມທະວີບົດບາດການຄຸ້ມຄອງ, ການຕິດຕາມ, ກວດກາ ແລະ ຊຸກຍູ້ ການຈັດຕັ້ງປະຕິບັດມາດຕະການ ປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດ COVID-19 ໃນຂອບເຂດທີ່ຕົນຮັບຜິດຊອບ ແລະ ຄຸ້ມຄອງ ແລະ ລາຍງານໃຫ້ຂັ້ນເທິງຮັບຊາບ ຢ່າງເປັນປົກກະຕິ ແລະ ທັນເວລາ, ພ້ອມນີ້, ຕ້ອງກໍານົດມາດຕະການຕໍ່ຜູ້ທີ່ລະເມີດ ຂໍ້ຫ້າມຕ່າງໆຂອງຄະນະສະເພາະກິດແຕ່ລະຂັ້ນຢ່າງເຄັ່ງຄັດ.

14. ແຈ້ງການສະບັບນີ້ ມີຜົນສັກສິດ ແລະ ນໍາໃຊ້ໄດ້ຊົ່ວຄາວ ຖ້າມີການປຽນແປງຈະແຈ້ງໃຫ້ຊາບຕາມພາຍຫຼັງ.

ດັ່ງນັ້ນ, ຈຶ່ງແຈ້ງການມາຍັງທ່ານ ເພື່ອຊາບ ແລະ ພ້ອມກັນຈັດຕັ້ງປະຕິບັດຕາມນີ້ດ້ວຍ

Related Posts

Leave a Reply

Your email address will not be published. Required fields are marked *