ປີນີ້ແຂວງອັດຕະປື ກໍານົດ ແຜນປູກໄມ້ 3.660 ເຮັກຕາ

ຂປລ.ປີ 2021 ນີ້, ແຂວງອັດຕະປື ໄດ້ກະກຽມຄວາມພ້ອມຮອບດ້ານ ເພື່ອຈັດຕັ້ງປະຕິບັດວຽກງານການປູກໄມ້ ເພື່ອຟື້ນຟູປ່າ ໂດຍເລີ່ມແຕ່ການເກັບແກ່ນ, ການຜະລິດເບ້ຍໄມ້ ແລະ ການກໍານົດເນື້ອທີ່ປູກ, ພ້ອມທັງກໍານົດແຜນການທີ່ຈະປູກໃຫ້ໄດ້ໃນເນື້ອທີ່ 3.660 ເຮັກຕາ .

ທ່ານ ພອນປະເສີດ ທອງສີທາວົງ ຫົວໜ້າພະແນກກະສິກໍາ ແລະ ປ່າໄມ້ ແຂວງອັດຕະປື ໃຫ້ສໍາພາດເມື່ອບໍ່ດົນຜ່ານມານີ້ວ່າ: ໄລຍະຜ່ານມາຄະນະພັກ, ອໍານາດການປົກຄອງແຂວງອັດຕະປື ໄດ້ໃຫ້ຄວາມສໍາຄັນຕໍ່ວຽກງານຟື້ນຟູ ແລະ ປົກປັກຮັກສາຊັບພະຍາກອນປ່າໄມ້ ເຊິ່ງໃນແຕ່ລະປີໄດ້ມີການລົງທຶນສູງສົມຄວນຕໍ່ການວຽກງານການຟື້ນຟູປ່າໄມ້ ເພື່ອຄືນຄວາມອຸດົມສົມບູນໃຫ້ກັບທໍາມະຊາດ ກໍຄືລະບົບນິເວດຂອງປ່າໄມ້.

ສໍາລັບປີ 2021 ນີ້ທາງພະແນກກະສິກໍາ ແລະ ປ່າໄມ້ແຂວງ ໄດ້ກໍານົດແຜນການປູກໄມ້ໃຫ້ໄດ້ໃນເນື້ອທີ່ 3.660 ເຮັກຕາ ເຊິ່ງປັດຈຸບັນການກະກຽມຄວາມພ້ອມດ້ານຕ່າງໆແມ່ນສໍາເລັດໄປແລ້ວເປັນສ່ວນໃຫຍ່ ເປັນຕົ້ນ: ສາມາດເກັບແກ່ນໄດ້ທັງໝົດ 460 ກິໂລ, ຜະລິດເບ້ຍໄມ້ໄດ້ 348.928 ເບ້ຍ, ສະເພາະວັນທີ 1 ມິຖຸນານີ້ວັນປູກຕົ້ນໄມ້ແຫ່ງຊາດ ທົ່ວແຂວງຈະໄດ້ຈັດພິທີປູກຕົ້ນໄມ້ໃຫ້ໄດ້ 633,5 ເຮັກຕາ ແລະ ໄດ້ມອບໃຫ້ຫ້ອງການກະສິກໍາ ແລະ ປ່າໄມ້ 5 ເມືອງ ສົມທົບກັບພາກສ່ວນຕ່າງໆ ເປັນເຈົ້າການຈັດຕັ້ງໃນການປູກໄມ້ ໂດຍກໍານົດພື້ນ ທີ່ປູກທັງໃນ ແລະ ນອກ 3 ປະເພດປ່າ.

ທ່ານ ພອນປະເສີດ ທອງສີທາວົງ ໃຫ້ຮູ້ຕື່ມວ່າ: ອີງຕາມສະຖິຕິສໍາຫລວດໃນປີ 2015 ແຂວງອັດຕະປື ມີເນື້ອທີ່ປ່າໄມ້ທັງໝົດ 828.082 ເຮັກຕາ ຫລື ປະມານ 79,9% ຂອງເນື້ອທີ່ທົ່ວແຂວງ ຫລື ປະມານ 6% ຂອງເນືອທີ່ປ່າໄມ້ ທົ່ວປະເທດ.

ໂອກາດນີ້ທ່ານ ພອນປະເສີດ ທອງສີທາວົງ ຍັງໄດ້ ຮຽກຮ້ອງມາຍັງທຸກພາກສ່ວນໃນສັງຄົມ ຈົ່ງເປັນເຈົ້າການພ້ອມກັນປົກປັກຮັກສາ ແລະ ຫວງແຫນປ່າໄມ້ ພ້ອມກັນປະກອບສ່ວນ ຕາມເງື່ອນໄຂຄວາມອາດສາມາດ ເຂົ້າຮ່ວມການປູກໄມ້, ຟື້ນຟູປ່າ ແລະ ປົກປັກຮັກສາປ່າໄມ້ ໃຫ້ນັບມື້ມີຄວາມອຸດົມສົມບູນ ເພື່ອຕອບສະໜອງຄວາມຮຽກຮ້ອງຕ້ອງການ ວັດຖຸດິບດ້ານໄມ້ ແລະ ຜົນຜະລິດປ່າໄມ້ ໃຫ້ໄດ້ຢ່າງຍາວນານ ພ້ອມທັງເປັນການປົກປັກຮັກສາສິ່ງແວດລ້ອມ ຕາມທິດສີຂຽວ ແລະ ຍືນຍົງ.

ຂ່າວ: ວັດທະນາ

Related Posts

Leave a Reply

Your email address will not be published. Required fields are marked *