ແຂວງບໍ່ແກ້ວສືບຕໍ່ລາດຕະເວນທາງນໍ້າຢ່າງເປັນປົກກະຕິ

ທ້າຍເດືອນພຶດສະພາ 2021 ນີ້, ສະຫາຍ ພັນໂທ ຄໍາສອນ ໄຊຍະວົງ ຮອງຫົວໜ້າການເມືອງ ຫົວໜ້າຫ້ອງການເມືອງ ກອງບັນຊາການທະຫານແຂວງບໍ່ແກ້ວ ແລະ ສະຫາຍ ພັນໂທ ຈັນສຸກ ໄຊຍະປະທຸມ ຫົວຫນ້າກອງພັນປ້ອງກັນເຄື່ອນທີ່ ປກສ ແຂວງ ພ້ອມທີມງານ ໄດ້ສືບຕໍ່ປະຕິບັດມາດຕະການຕ້ານ ແລະ ສະກັດກັ້ນ ພະຍາດລະບາດໂຄວິດ-19 ຢ່າງເຂັ້ມງວດ ໃນການປ້ອງກັນເວນຍາມລາດຕະເວນຕາມຂອບເຂດຊາຍແດນ ລາວ-ໄທ, ແຕ່ຈຸດບ້ານຂອນແກ້ວ-ບ້ານດ່ານຖິ່ນ.

ເພື່ອປະຕິບັດຕາມມາດຕະການຕ່າງໆທີ່ຂັ້ນເທິງວາງອອກ ເວົ້າລວມ ເວົ້າສະເພາະ ການເພີ່ມທະວີກໍາລັງເຂົ້າໃນວຽກງານປ້ອງກັນເວນຍາມຂອບເຂດຊາຍແດນ ໂດຍໄດ້ຈັດຕັ້ງກຳລັງອ້າຍນ້ອງລາດຕະເວນທັງເວັນທັງຄືນທາງບົກ ແລະ ທາງນ້ຳ ຕະຫລອດ 24 ຊົ່ວໂມງ.

ໃນແຕ່ລະຈຸດຮັບ ຜິດຊອບຂອງເມືອງຫ້ວຍຊາຍ ເຊິ່ງເປັນເຂດຊາຍແດນຕິດຈອດກັບ ຣາຊາອານາຈັກໄທ ໂດຍໃນໄລຍະຜ່ານມາເຂດດັ່ງກ່າວກໍຍັງມີບຸກຄົນຈຳນວນໜຶ່ງທີ່ຝ່າຝືນມາດຕະການທີ່ຂັ້ນເທິງວາງອອກ.

ໂດຍສະ ເພາະແມ່ນບັນຫາປະກົດການຫຍໍ້ທາງສັງຄົມເປັນຕົ້ນແມ່ນ ການຄ້າຂາຍເຖືອນ ຄ້າຢາເສບຕິດ ແລະ ການລັກລອບເຂົ້າເມືອງແບບຜິດກົດໝາຍ.

ພ້ອມນັ້ນ ສອງກຳລັງ (ທະຫານ-ຕຳຫຼວດ) ຍັງໄດ້ປະຕິບັດມາດຕະການຕ່າງໆຢ່າງເຂັ້ມງວດຕໍ່ບຸກຄົນທີ່ກະທຳຜິດ ເຖິງຢ່າງໃດກໍຕາມພວກເຮົາກໍຈະສຸມທຸກກຳລັງເຂົ້າໃນວຽກງານດັ່ງກ່າວ

ເພື່ອເຮັດໃຫ້ສະພາບພາຍໃນຂອບເຂດຮັບ ຜິດຊອບຂອງຕົນເອງໃຫ້ມີຄວາມສະຫງົບໂດຍພື້ນຖານ ເພື່ອແນໃສ່ ສະກັດກັ້ນ ແລະ ຕອບຕ້ານ ການແຜ່ລະບາດຂອງເຊື້ອພະຍາດໂຄວິດ-19 ພາຍໃນແຂວງໃຫ້ຫຼຸດລົງເປັນກ້າວໆ.

ໂດຍ: ວໍລະສິດ ພິດສະຫາຍ.

Related Posts

Leave a Reply

Your email address will not be published. Required fields are marked *