ວັກຊີນຟາຍເຊີ ກັນພະຍາດໂ ຄ ວິ ດ ຊຸດໃໝ່ 100.620 ໂດສ ມາຮອດ ສປປ ລາວ ແລ້ວ

ຂປລ. ໃນວັນທີ 2 ມິຖຸນາ ປີ 2021 ທີ່ນະຄອນຫລວງວຽງຈັນ, ສປປ ລາວ ໄດ້ຮັບວັກຊີນກັນພະຍາດໂຄວິດ-19 ຊຸດໃໝ່ ປະກອບມີ ວັກຊີນຟາຍເຊີ (Pfizer BioNTech) ຈຳນວນ 100.620 ໂດສ ຈາກໂຄງການການຮ່ວມມື ເພື່ອວັກຊີນກັນພະຍາດໂຄວິດ-19 (COVAX Facility), ເຊິ່ງເປັນການຮ່ວມມືກັນລະຫວ່າງ ອົງການພັນທະມິດຮ່ວມມືດ້ານນະວັດຕະກໍາ ເພື່ອຮັບມືກັບພະຍາດລະບາດ, ອົງການກາວີ, ອົງການອຸຍນິເຊັບ ແລະ ອົງການອະນາໄມໂລກ.

ອີງຕາມແຜນປະຕິບັດການ ສັກວັກຊີນກັນພະຍາດໂຄວິດ-19 ແຫ່ງຊາດ ທີ່ລັດຖະ ບານ ແຫ່ງ ສປປ ລາວ ໄດ້ພັດທະນາຂຶ້ນ, ວັກຊີນຊຸດນີ້ເເມ່ນຈະໄດ້ນຳໃຊ້ ເພື່ອທຳການສັກຢາກັນພະຍາດ ໃຫ້ແກ່ປະຊາກອນຈຳນວນ 50.300 ຄົນ ທີ່ມີອາຍຸ 60 ປີຂຶ້ນໄປ ແລະ ເປັນພະຍາດຊໍ້າເຮື້ອ.

ການສັກວັກຊີນດັ່ງກ່າວ ຈະໄດ້ເລີ່ມຈັດຕັ້ງປະຕິບັດຢູ່ໃນ ນະຄອນຫລວງວຽງຈັນ ເເລະ ຈະໄດ້ຖືກຜັນຂະຫຍາຍໄປສູ່ເຂດທີ່ມີຄວາມສ່ຽງສູງອື່ນໆ ເຊັ່ນ: ແຂວງບໍ່ແກ້ວ, ແຂວງຈຳປາສັກ ແລະ ແຂວງສະຫວັນນະເຂດ.

ທ່ານ ດຣ. ສະໜອງ ທອງຊະນະ ຮອງລັດຖະມົນຕີກະຊວງສາທາລະນະສຸກ ກ່າວວ່າ: ການມາຮອດຂອງວັກຊີນຟາຍເຊີ ແມ່ນທັນການກັບເປົ້າໝາຍ ທີ່ລັດຖະບານແຫ່ງ ສປປ ລາວ ໄດ້ວາງໄວ້ ໃນການສັກວັກຊີນກັນພະຍາດໂຄວິດ-19 ເພື່ອປົກປ້ອງ 50% ຂອງຈຳນວນປະຊາກອນທັງໝົດ ໃນປີ 2021.

ວັກຊີນເຫລົ່ານີ້, ຈະຊ່ວຍໃຫ້ພວກເຮົາສາມາດກ້າວໄປສູ່ການບັນລຸເປົ້າໝາຍດັ່ງກ່າວ. ເຖິງແມ່ນວ່າວັກຊີນຈະຊ່ວຍໃຫ້ບັນດາປະເທດຕ່າງໆ ຄວບຄຸມພະຍາດໂຄວິດ-19 ໄດ້ກໍຕາມ, ພວກເຮົາກໍຍັງຕ້ອງສືບຕໍ່ປະຕິບັດການ ຮັກສາໄລຍະຫ່າງທາງສັງຄົມ, ໃສ່ໜ້າຜ້າອັດປາກ-ດັງ ເເລະ ໝັ່ນລ້າງມືຂອງຕົນເປັນປະຈຳ, ເຖິງວ່າທ່ານໄດ້ສັກຢາວັກຊີນກັນພະຍາດໂຄວິດ-19 ຄົບ 2 ເຂັມແລ້ວກໍຕາມ. ວັກຊີນກັນພະຍາດໂຄວິດ-19 ທັງ 3 ຊະນິດ ທີ່ໄດ້ນໍາໃຊ້ໃນ ສປປ ລາວ ເເມ່ນໄດ້ຜ່ານຂັ້ນຕອນການທົດສອບດ້ານການພັດທະນາ ແລະ ຄວາມປອດໄພຢ່າງເຂັ້ມງວດ ເເລະ ກົມອາຫານ ແລະ ຢາ ຂອງກະຊວງສາທາລະນະສຸກ ໄດ້ເຮັດການປະເມີນຫລັກຖານ, ຜົນປະໂຫຍດ ແລະ ຄວາມສ່ຽງແລ້ວ.

ວັກຊີນຟາຍເຊີ ໄດ້ຖືກອະນຸມັດເຂົ້າໃນລາຍຊື່ການນຳໃຊ້ສຸກເສີນ ຂອງອົງການອະນາໄມໂລກ ໃນທ້າຍປີ 2020.
ທ່ານ ດຣ. ມາກ ຈາກອບສ໌ ຜູ້ຕາງໜ້າອົງການອະນາໄມໂລກ ປະຈຳ ສປປ ລາວ ກ່າວວ່າ: ພວກເຮົາຍິນດີຕ້ອນຮັບດ້ວຍຄວາມປຶ້ມປິຕິ ວັກຊີນຟາຍເຊີ ຊຸດນີ້ຈາກໂຄງການ COVAX Facility.

ຂ້າພະເຈົ້າຂໍຖືໂອກາດນີ້ ສະເເດງຄວາມຊົມເຊີຍຕໍ່ລັດຖະ ບານແຫ່ງ ສປປ ລາວ ໃນການເສີມສ້າງຂີດຄວາມສາມາດ ໃນການຮອງຮັບວັກຊີນຟາຍເຊີ ເຊິ່ງເປັນວັກຊີນທີ່ຕ້ອງການ ການເກັບຮັກສາເປັນພິເສດ ເພື່ອຮັກສາປະສິດທິພາບຂອງວັກຊີນ.
ການຮັບວັກຊີນຊຸດໃໝ່ນີ້ ເປັນຊຸດທີ່ສອງຂອງ ສປປ ລາວ ທີ່ໄດ້ຮັບການສະໜັບສະໜູນຈາກໂຄງການ COVAX Facility, ເຊິ່ງວັກຊີນຊຸດທຳອິດ ປະກອບມີວັກຊີນປະເພດ AstraZeneca/Oxford ຈຳນວນ 132.000 ໂດສ ແລະ ຄາດວ່າ ສປປ ລາວ ຈະໄດ້ຮັບວັກຊີນເພີ່ມອີກພາຍໃນທ້າຍປີນີ້.

Related Posts

Leave a Reply

Your email address will not be published. Required fields are marked *