ຄິວລົດສາຍເໜືອນະຄອນຫລວງວຽງຈັນ ເປີດປົກກະຕິ ແຕ່ຍັງບໍ່ມີຜູ້ໂດຍສານເຂົ້າເງື່ອນໄຂ

ວັນທີ 7 ມິຖຸນາ 2021 ນີ້ ທ່ານ ນາງ ຈິດປະສົງ ຫລວງເດດມີໄຊ ອຳນວຍການສະຖານີຂົນສົ່ງໂດຍສານສາຍເໜືອ ໃຫ້ຮູ້ວ່າ: ສະຖານີຂົນສົ່ງໂດຍສານສາຍເໜືອ ນະຄອນຫລວງວຽງຈັນ ເປີດໃຫ້ບໍລິການເລີ່ມແຕ່ວັນທີ 5 ມິຖຸນາ 2021 ເປັນຕົ້ນມາ ຕາມການອະນຸຍາດຂອງຄະນະສະເພາະກິດ.

ລະບຸຊັດເຈນວ່າ ອະນຸຍາດໃຫ້ດໍາເນີນການຂົນສົ່ງໂດຍສານທາງບົກ ລະຫວ່າງ ເເຂວງຕໍ່ເເຂວງທີ່ບໍ່ມີການລະບາດໃນຊຸມຊົນໄດ້ໂດຍບໍ່ໃຫ້ກັກໂຕ, ເເຕ່ຕ້ອງປະຕິບັດຕາມມາດຕະການທີ່ຄະນະສະເພາະກິດວາງອອກຢ່າງເຂັ້ມງວດ ເປັນຕົ້ນເເທກອຸນຫະພູມ, ການຮັກສາໄລຍະ ຫ່າງ ຢ່າງຫນ້ອຍ 01 ເມັດ, ໃສ່ຜ້າອັດປາກ-ດັງ, ລ້າງມືດ້ວຍນ້ໍາສະອາດ ໃສ່ສະບູ ຫຼືເຈລລ້າງມື ຄັກເເນ່.

ອະນຸຍາດໃຫ້ດໍາເນີນການຂົນສົ່ງໂດຍສານທາງບົກ ແລະ ທາງອາກາດ ລະຫວ່າງນະຄອນຫຼວງວຽງຈັນ ກັບ ບັນດາແຂວງທົ່ວປະເທດ ສໍາລັບຜູ້ໂດຍສານທີ່ສັກວັກຊີນ ຄົບ 2 ເຂັ້ມ ໄດ້ 01 ເດືອນຂຶ້ນໄປ ໂດຍບໍ່ໃຫ້ມີການກັກກັນ 14 ວັນ, ເເຕ່ພະນັກງານຮັບ ຜິດຊອບສາຍການບິນ, ພະນັກງານລົດຂົນສົ່ງ ເເລະ ຜູ້ໂດຍສານ ຕ້ອງມີຄວາມຮັບຜິດ ຊອບໃຫ້ມີການເເທກອຸນຫະພຸມ, ກວດກາການໃສ່ຜ້າອັດປາກ-ດັງ, ລ້າງມືດ້ວຍນ້ໍາສະອາດ ໃສ່ສະບູ ຫຼື ເຈລລ້າງມື.

ເນື່ອງຈາກມີເງື່ອນໄຂ ຄືດັ່ງກ່າວ ແຕ່ປະຊາຊົນຜູ້ທີ່ຈຳເປັນຈະເດີນທາງສ່ວນຫລາຍ ແມ່ນບໍ່ໄດ້ສັກວັກຊີນ ຫລື ສັກກໍບໍ່ທັນຄົບ 1 ເດືອນ ເຊິ່ງພາຍຫລັງເປີດໄດ້ເປັນເວລາ 3 ວັນ ຍັງບໍ່ສາມາດອອກລົດໂດຍສານໄດ້ແມ່ນແຕ່ຄັນດຽວ.

ແຕ່ເຖິງຢ່າງໃດກໍຕາມອຳນວຍການສະຖານີຂົນສົ່ງຍັງບໍ່ໄດ້ຊີ້ແຈງເລື່ອງການຈະເປີດຕໍ່ໄປໄດ້ເຖິງມື້ໃດ ຕ້ອງລໍຕິດຕາມການລາຍງານຂ່າວຕໍ່ໄປ.

Related Posts

Leave a Reply

Your email address will not be published. Required fields are marked *