ສະຖາບັນພະຍາດຜິວໜັງໄທເຕືອນ ບາດແຜຈາກແມວກັດ ອາດເຖິງຕາຍຈາກແບັກທີເຣຍກິນຊີ້ນຄົນ

ວັນທີ 5 ມິຖຸນາ, ດຣ. ສົມສັກ ອຳມະສິນ ອະທິບໍດີກົມການແພດຂອງໄທ ເປີດເຜີຍວ່າ: ຈາກກໍລະນີຂ່າວອຸທາຫອນຜູ້ຍິງຖືກແມວທີ່ລ້ຽງໄວ້ກັດຕີນ ສຸດທ້າຍຊີ້ນຕາຍ ຕິດເຊື້ອແບັກທີເຣຍກິນຊີ້ນຈາກນໍ້າລາຍແມວ.

ຈາກຂໍ້ມູນດັ່ງກ່າວຂໍຮຽນວ່າ: ໝາ ແລະ ແມວເປັນສັດລ້ຽງຍອດນິຍົມ ເພາະຄວາມໜ້າຮັກ, ສະຫລຽວສະຫລາດຂອງມັນ, ບາງເທື່ອໝາ ແລະ ແມວອາດກັດ ຫລື ຄູດຄົນທີ່ຫລິ້ນກັບມັນ ເພາະສັດລ້ຽງຖືກເຮັດໃຫ້ຕົກໃຈ. ແມວມີແຂ້ວແຫລມຍາວກວ່າແຂ້ວໝາ ຈຶ່ງອາດເກີດການຕິດເຊື້ອແບັກທີເຣຍເຂົ້າໄປໃນກະດູກ ແລະ ຂໍ້.

ແບັກທີເຣຍທີ່ເປັນສາເຫດຂອງການຕິດເຊື້ອຂອງບາດແຜແມວກັດສ່ວນຫລາຍເປັນແບັກທີເຣຍທີ່ອາໄສຢູ່ໃນຊ່ອງປາກຂອງແມວ ລວມທັງແບັກທີເຣຍທີ່ພົບໃນຜິວໜັງຂອງຄົນທີ່ປົນເປື້ອນໃນແຂ້ວແມວ ແລ້ວເຂົ້າສູ່ບາດແຜແມວກັດ ຜູ້ທີ່ຖືກສັດກັດທີ່ໄປພົບແພດຫລັງ 8 ຊົ່ວໂມງ ມັກມີການຕິດເຊື້ອແບັກທີເຣຍແລ້ວ.

ທ່ານ ໝໍ ມິ່ງຂວັນ ວິໄຊດິດ ຜູ້ອຳນວຍການສະຖາບັນພະຍາດຜິວໜັງ ກົມການແພດ ກ່າວເພີ່ມວ່າ: ສ່ວນຫລາຍບໍລິເວນທີ່ຖືກກັດຈະມີຮູແຂ້ວ, ບໍລິເວນອ້ອມຮອບຈະມີອາການປວດ, ໄຂ່,ແດງ ອາດມີໜອງໄຫລອອກມາຈາກຮູແຂ້ວ ຖ້າຕິດເຊື້ອຈາກແບັກທີເຣຍສາຍພັນຮຸນແຮງທີ່ເອີ້ນວ່າ:

“ແບັກທີເຣຍກິນຊີ້ນຄົນ” ແບັກທີເຣຍຈະປ່ອຍສານທີ່ເຮັດໃຫ້ເສັ້ນເລືອດອຸດຕັນ ຈົນເກີດອາການປວດບາດແຜຢ່າງຮຸນແຮງ, ມີໄຂ້ສູງ, ອ່ອນເພຍ ແລະ ເກີດຊີ້ນຕາຍສີດຳລຸກລາມຢ່າງວ່ອງໄວໃນບາດແຜ, ຊີ້ນຕາຍສີດຳເປັນແຫລ່ງທີ່ເຮັດໃຫ້ແບັກທີເຣຍຈະເລີນເຕີບໃຫຍ່ຢ່າງວ່ອງໄວ ຈົນອາດລຸກລາມຕິດເຊື້ອໃນກະແສເລືອດ ເຮັດໃຫ້ເສຍຊີວິດໄດ້ ຖ້າມີອາການດັ່ງກ່າວຕ້ອງຟ້າວໄປໂຮງໝໍ ແພດຈະໃຫ້ການປິ່ນປົວ ແລະ ຈະຟ້າວຜ່າຕັດເອົາຊີ້ນຕາຍສີດຳອອກ ພ້ອມທັງສັກຢາປະຕິຊີວະນະເຂົ້າເສັ້ນເລືອດ.

ຜູ້ອຳນວຍການສະຖາບັນພະຍາດຜິວໜັງໃຫ້ຄຳແນະນຳເພີ່ມອີກວ່າ: ແນວທາງການເບິ່ງແຍງບາດແຜແມວກັດໃຫ້ຟ້າວລ້າງບາດແຜດ້ວຍສະບູ່ ຫລື ນໍ້າຢາຟອກຂ້າເຊື້ອ ຖ້າມີໜອງໃຫ້ເຈາະລະບາຍໜອງ ຖ້າເປັນບາດແຜຈີກຂາດເພາະແມວຄູດ ເປັນບາດແຜເປີດບໍ່ຄວນຫຍິບແຜ ປ່ອຍບາດແຜເປີດ ແລະ ລ້າງ ປ້ອງກັນການຕິດເຊື້ອລຸກລາມໃນເນື້ອເຫຍື່ອຊັ້ນເລິກໃຕ້ຜິວໜັງ ຢ່າລືມສັກວັກຊີນປ້ອງກັນບາດທະຍັກນຳ ຖ້າສັດລ້ຽງບໍ່ເຄີຍສັກວັກຊີນ ຄົນທີ່ຖືກກັດຕ້ອງຟ້າວສັກວັກຊີນພະຍາດໝາຫວໍ້,

ຢາປະຕິຊີວະນະທີ່ຄວນໃຊ້ຂ້າເຊື້ອຄວບຄຸມແບັກທີເຣຍທີ່ເປັນສາເຫດການຕິດເຊື້ອຄື Amoxicillin / Clavulanic acid ທີ່ແພດຈະສັ່ງຈ່າຍ ຮັບປະທານ 7-10 ວັນ.

Related Posts

Leave a Reply

Your email address will not be published. Required fields are marked *