ສະຖານທູດຝຣັ່ງ ມອບອາຫານໃຫ້ແພດໝໍ ແລະ ຄົນ​ເຈັບ ຢູ່ໂຮງໝໍມະໂຫສົດ .

ໃນວັນທີ 14 ກໍລະກົດ 2021 ນີ້, ຢູ່ໂຮງໝໍມະໂຫສົດ ນະຄອນຫລວງວຽງຈັນ, ທ່ານ ດຣ. ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ ໄດ້ເປັນກຽດຮັບອາຫານຈໍານວນ 4.500 ກ່ອງ ຈາກ ທ່ານ ນາງ ຟໍຣຣອງ ຊັອງບັລອງ-ຣີສແລກ ເອກອັກຄະລັດຖະທູດຝຣັ່ງ ປະຈໍາ ສປປ ລາວ ເພື່ອແຈກຢາຍໃຫ້ບັນດາແພດໝໍ ແລະ ຄົນເຈັບ ຢູ່ໂຮງໝໍມະໂຫສົດ, ເນື່ອງໃນໂອກາດວັນຊາດຝຣັ່ງ ວັນທີ 14 ກໍລະກົດ.

ທ່ານ ທູດຝຣັ່ງ ໄດ້ມີຄໍາເຫັນວ່າ: ໂດຍປົກກະຕິແລ້ວ, ໃນແຕ່ລະປີຈະມີການຈັດງານລ້ຽງເພື່ອສະເຫລີມສະຫລອງວັນຊາດຝຣັ່ງ ທີ່ສະຖານທູດຝຣັ່ງ ປະຈໍາ ສປປ ລາວ, ແຕ່ປີນີ້ໄດ້ມີການລະບາດຂອງພະຍາດໂຄວິດ-19 ຈຶ່ງໄດ້ປ່ຽນມາເປັນການຊື້ອາຫານແຈກຢາຍ ໃຫ້ແກ່ແພດໝໍ ແລະ ຜູ້ປ່ວຍຢູ່ໂຮງໝໍມະໂຫສົດ, ໃນໄລຍະການລະບາດຂອງພະຍາດໂຄວິດ-19 ໂດຍຈະແຈກຢາຍອາຫານຈໍານວນ 4.500 ກ່ອງ ແລະ ແບ່ງເປັນ 500 ກ່ອງຕໍ່ມື້ ຈໍານວນ 9 ມື້.

ນອກຈາກນີ້, ຍັງຈະໄດ້ມອບອາຫານໃຫ້ໂຮງໝໍແຂວງສະຫວັນນະເຂດ ຈໍານວນ 2.000 ກ່ອງ ລວມມູນຄ່າ 112 ລ້ານກວ່າກີບ, ໂດຍແມ່ນງົບປະມານສົບທົບ ຂອງສະ​ຖານທູດ ແລະ ບໍລິສັດ ຝຣັ່ງ ໃນລາວຈໍານວນໜຶ່ງ.

ໃນໂອກາດນີ້, ທ່ານລັດຖະມົນຕີ ກະຊວງສາທາລະນະສຸກ ໄດ້ມີຄໍາເຫັນສະແດງຄວາມຂອບ ໃຈຕໍ່ການຊ່ວຍເຫລືອຄັ້ງນີ້, ເຊິ່ງເປັນການບິແບ່ງນໍ້າໃຈ ເພື່ອຊ່ວຍເຫລືອສັງຄົມ ກໍຄື ແພດໝໍ ແລະ ຄົນເຈັບ ໃນໄລຍະການລະບາດຂອງພະຍາດໂຄວິດ-19 ແລະ ໃນໄລຍະຜ່ານມາ ຝຣັ່ງໄດ້ໃຫ້ການຊ່ວຍເຫລືອໃນຂະແໜງສາທາລະນະສຸກ ຫລາຍໂຄງການ ເຊັ່ນ: ໂຄງການຄົ້ນຄວ້າວິທະຍາສາດກ່ຽວກັບພະຍາດເຂດຮ້ອນ ແລະ ຊ່ວຍຝຶກອົບຮົມໃຫ້ແກ່ພະນັກງານແພດໝໍລາວ ອີກຫລາຍໂຄງການ.

ຂ່າວ: ສຸພາສະຫວັນ

Related Posts

Leave a Reply

Your email address will not be published.