ທ່ານ ພັນຄຳ ວິພາວັນ ນາຍົກລັດຖະມົນຕີ ເນັ້ນໃຫ້ 4 ພາກສ່ວນ

ທ່ານ ພັນຄຳ ວິພາວັນ ນາຍົກລັດຖະມົນຕີ ເນັ້ນໃຫ້ 4 ພາກສ່ວນກ່ຽວກັບການດໍາເນີນຄະດີຕາມຂະບວນຍຸຕິທໍາເອົາໃຈໃສ່ຕື່ມ 6 ບັນຫາສຳຄັນ
……….

ໃນວັນທີ 14-15 ກໍລະກົດ 2021 ຜ່ານມາ ທີ່ສານປະຊາຊົນສູງສຸດ ໄດ້ຈັດກອງປະຊຸມ 4 ພາກສ່າວນກ່ຽວກັບການດໍາເນີນຄະດີຕາມຂະບວນຍຸຕິທໍາ ຄັ້ງທີ VI ມີ: ສານປະຊາຊົນສູງສຸດ,

ກະຊວງປ້ອງກັນຄວາມສະຫງົບ, ກະຊວງຍຸຕິທໍາ ແລະ ອົງການໄອຍະການປະຊາຊົນສູງສຸດ. ໂດຍການເປັນປະທານຂອງ ທ່ານ ນາງ ວຽງທອງ ສີພັນດອນ ຄະນະເລຂາທິການສູນກາງພັກ ເລຂາຄະນະພັກ ປະທານສານປະຊາຊົນສູງສຸດ ແລະ ໃຫ້ກຽດເຂົ້າຮ່ວມໂອ້ລົມຂອງ ທ່ານ ພັນຄຳ ວິພາວັນ ກຳມະການກົມການເມືອງສູນກາງພັກ ນາຍົກລັດຖະມົນຕີ ແຫ່ງ ສປປ ລາວ ແລະ ມີທ່ານລັດຖະມົນຕີກະຊວງປ້ອງກັນຄວາມສະຫງົບ, ລັດຖະມົນຕີກະຊວງຍຸຕິທໍາ, ຫົວໜ້າອົງການໄອຍະການປະຊາຊົນສູງສຸດ ພ້ອມດ້ວຍການນໍາຂອງ 4 ພາກສ່ວນ ແລະ ແຂກຖືກເຊີນເຂົ້າຮ່ວມ.

ໃນກອງປະຊຸມດັ່ງກ່າວ ທ່ານ ພັນຄຳ ວິພາວັນ ນາຍົກລັດຖະມົນຕີ ໄດ້ມີຄຳເຫັນໂອ້ລົມເນັ້ນໃຫ້ 4 ພາກສ່ວນ ເອົາໃຈໃສ່ຕື່ມ 6 ບັນຫາສໍາຄັນດັ່ງນີ້:

1. ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ພະນັກງານທີ່ຢູ່ໃນຄວາມຮັບຜິດຊອບຂອງຕົນ (ເຈົ້າໜ້າທີ່ຕໍາຫຼວດ, ໄອຍະການປະຊາຊົນ, ຜູ້ພິພາກສາ ແລະ ພະນັກງານປະຕິບັດຄໍາຕັດສິນຂອງສານ) ໃຫ້ມີຈັນຍາບັນ-ຈັນຍາທໍາໃນການປະຕິບັດໜ້າທີ່ແທ້ໆ ເນື່ອງຈາກວ່າໃນເງື່ອນໄຂແຫ່ງການປະຕິບັດກົນໄກເສດຖະກິດຕະຫຼາດ, ການເຊື່ອມໂຍງກັບສາກົນບວກໃສ່ກຸ່ມຄົນບໍ່ດີ ແລະ ອິດທິກໍາລັງປໍລະປັກ ໄດ້ດໍາເນີນສົງຄາມຫັນປ່ຽນໂດຍສັນຕິ ຊຶ່ງໄດ້ຊັກຈູງໃຫ້ສະມາຊິກພັກ-ພະນັກງານຂອງພວກເຮົາຈຳນວນໜຶ່ງ ບໍ່ມີຫລັກໝັ້ນ, ອຸດົມການ, ຂາດຈັນຍາບັນ, ຈັນຍາທໍາ. ສ້າງເງື່ອນໄຂ, ສວຍໃຊ້ຊ່ອງວ່າງຂອງກົດໝາຍກົດໜ່ວງການດໍາເນີນຄະດີຊັກຊ້າ, ຫຼົບໄປຫຼົບມາ, ບໍ່ໄປຕາມກົດໝາຍກໍານົດ ເພື່ອຫາຜົນປະໂຫຍດສ່ວນຕົວ.

2. ເອົາໃຈໃສ່ຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ XI ຂອງພັກກ່ຽວກັບການດໍາເນີນຄະດີຕາມຂະບວນການຍຸຕິທໍາ ກໍຄືມະຕິ 112/ກມສພ ລົງວັນທີ 2 ມິຖຸນາ 2021 ວ່າດ້ວຍການຍົກສູງປະສິດທິພາບໃນການດຳເນີນຄະດີຕາມຂະບວນຍຸຕິທໍາ ໃຫ້ເປັນແຜນງານປະຕິບັດລະອຽດແຕ່ລະດ້ານວ່າ ການສືບສວນ-ສອບສວນ ຈະປັບປຸງແກ້ໄຂດ້ານໃດໃຫ້ຖືກເປົ້າໝາຍ, ມີຫຼັກຖານຄົບຖ້ວນຮັດກຸມ. ການສັ່ງຟ້ອງ ຈະເຮັດແນວໃດໃຫ້ສັ່ງຟ້ອງຜູ້ທີ່ໄດ້ກະທໍາຜິດແທ້ໃຫ້ສານຕັດສິນ.

3. ສຸມໃສ່ສ້າງພະນັກງານດໍາເນີນຄະດີໃຫ້ມີຄວາມຮູ້ ຄວາມສາມາດ, ມີຄວາມຊ່ຽວຊານ ແລະ ເປັນມືອາຊີບໃນສະເພາະດ້ານ ເພື່ອເຮັດໃຫ້ບັນຫາຂໍ້ຂັດແຍ່ງ ແລະ ການລະເມີດກົດໝາຍທີ່ເກີດຂຶ້ນ ໄດ້ຮັບການແກ້ໄຂຢ່າງວ່ອງໄວ ແລະ ຖືກຕ້ອງ. ເນື່ອງຈາກວ່າການພັດທະນາເສດຖະກິດ-ສັງຄົມມີການຂະຫຍາຍຕົວສູງ, ການຄ້າ-ການລົງທຶນ ໄດ້ເປີດກວ້າງຢູ່ໃນສັງຄົມ. ຂໍ້ຂັດແຍ່ງ ແລະ ອາດຊະຍາກໍາທີ່ເກີດຂຶ້ນ ກໍໄປຄຽງຄູ່ກັບການພັດທະນາ, ມີຄວາມຫຍຸ້ງຍາກ, ສັບສົນ, ສະຫຼັບສັບຊ້ອນ ແລະ ພົວພັນກັບຫຼາຍບຸກຄົນ, ຫຼາຍຝ່າຍ ທັງຢູ່ພາຍໃນປະເທດ ແລະ ຕ່າງປະເທດ, ພົວພັນຫຼາຍກົດໝາຍ ທັງກົດໝາຍພາຍໃນປະເທດ ແລະ ກົດໝາຍສາກົນ.

4. ເອົາໃຈໃສ່ປັບປຸງແບບແຜນ, ກົນໄກການດໍາເນີນຄະດີຢູ່ແຕ່ລະຂັ້ນຕອນໃຫ້ມີຄວາມວ່ອງໄວ, ໂປ່ງໃສ ແລະ ຖືກຕ້ອງຕາມກົດໝາຍ ໃຫ້ສາມາດກວດສອບໄດ້ທຸກຂັ້ນຕອນການດຳເນີນຄະດີ. ເຮັດຕາມກົດໝາຍກໍານົດຢ່າງເຄັ່ງຄັດ. ຫຼີກລ່ຽງທີ່ສຸດ ບໍ່ມີກົດໝາຍ, ບໍ່ມີນິຕິກໍາ ກໍພາກັນເຮັດ, ສວຍໃຊ້ຊ່ອງວ່າງກົດໝາຍ ກົດໜ່ວງທ່ວງດຶງການດຳເນີນຄະດີໃຫ້ຊັກຊ້າ ແກ່ຍາວ ແລະ ມີສອງມາດຕະຖານໃນການປະຕິບັດ ພາໃຫ້ເກີດມີການຊັ່ງຊາ ປຽບທຽບການແກ້ໄຂຄະດີຂອງແຕ່ລະອົງການ.

5. ເອົາໃຈໃສ່ ໂຄສະນາເຜີຍແຜ່ກົດໝາຍໃຫ້ກວ້າງຂວາງ ແລະ ທົ່ວເຖິງໃນສັງຄົມ ເພື່ອໃຫ້ປະຊາຊົນ ຮັບຮູ້, ເຂົ້າໃຈຕໍ່ກົດໝາຍ, ຍົກສູງສະຕິກົດໝາຍຢູ່ໃນສັງຄົມໃຫ້ສູງຂຶ້ນ ເນື່ອງຈາກວ່າຜ່ານມາກົດໝາຍ ແລະ ນິຕິກໍາໃຕ້ກົດໝາຍໄດ້ອອກມາຫຼາຍ ແຕ່ກົດໝາຍ ແລະ ນິຕິກໍາເຫຼົ່ານັ້ນຍັງຢູ່ໃນຕູ້, ຢູ່ຫ້ອງການເຮັດວຽກ, ຍັງບໍ່ໄດ້ແຈກຢາຍ ຫຼື ເຜີຍແຜ່ໃຫ້ປະຊາຊົນ ແລະ ພາກສ່ວນອື່ນຮັບຮູ້ ເຂົ້າໃຈຢ່າງທົ່ວເຖິງ. ຈຶ່ງເຮັດໃຫ້ການສ້າງຂໍ້ຜູກພັນ, ສັນຍາຕ່າງໆ ບໍ່ໄປຕາມກົດໝາຍກໍານົດ, ມີການລະເມີດກົດ ໝາຍ, ກໍອາດຊະຍາກໍາທີ່ຂັດກັບກົດໝາຍນັບມື້ນັບຫຼາຍຂຶ້ນ.

6. ເພີ່ມທະວີຄວາມຮັບຜິດຊອບ ໃນການປະຕິບັດໜ້າທີ່ວິຊາສະເພາະຂອງແຕ່ລະພາກສ່ວນໃຫ້ເຂັ້ມງວດຕາມກົດໝາຍ ເພື່ອເຮັດໃຫ້ການດໍາເນີນຄະດີມີຄວາມໂປ່ງໃສ, ວ່ອງໄວ ແລະ ມີຄຸນນະພາບ ເພື່ອປົກປ້ອງສິດຜົນປະໂຫຍດອັນຊອບທໍາຂອງລັດ, ຂອງພົນລະເມືອງ. ຮັບປະກັນສິດເສລີພາບ, ກຽດສັກສີ, ສຸຂະພາບ ແລະ ຊິວິດຂອງພົນລະເມືອງຢູ່ໃນທຸກຂັ້ນຕອນຂອງການດຳເນີນຄະດີຕາມຂະບວນຍຸຕິທໍາ.

Related Posts

Leave a Reply

Your email address will not be published.