ພຽງ 15 ວັນ ຜູ້ຊົມໃຊ້ໄຟຟ້າຫຼາຍກວ່າພັນຄົນສະເໜີໃຊ້ບໍລິການ

15 ວັນ ເປີດຈຸດບໍລິການສະເພາະກິດ ລັດວິສາຫະກິດໄຟຟ້າລາວ ສາມາດແກ້ໄຂບັນຫາໄຟຟ້າ ຢູ່ ນະຄອນຫລວງວຽງຈັນ ໄດ້ຫລາຍກ່ວາ 1 ພັນກໍລະນີ.

ໃນກອງປະຊຸມປະເມີນ ການຕັ້ງຈຸດບໍລິການຮັບຄໍາຮ້ອງຂອງຜູ້ຊົມໃຊ້ໄຟຟ້າ ຢູ່ ນະຄອນຫຼວງວຽງຈັນ ຂອງ ລັດວິສາຫະກິດໄຟຟ້າລາວ ວັນທີ 16 ກໍລະກົດ 2021, ໂດຍການເປັນປະທານຂອງ ທ່ານ ຄູນ ບົວແພງພັນ ຮອງຜູ້ອໍານວຍການໃຫຍ່ ລັດວິສາຫະກິດໄຟຟ້າລາວ,

ໄດ້ສະຫລຸບຄືນຜົນການປະຕິບັດງານຂອງ ຈຸດບໍລິການ ສະເພາະກິດ ທີ່ໄດ້ເປີດຮັບຄໍາຮ້ອງເລີ່ມແຕ່ ວັນທີ 28 ມີຖຸນາ – 16 ກໍລະກົດ 2021 ເພື່ອແກ້ໄຂບັນຫາກ່ຽວກັບ ໃບບິນຄ່າໄຟຟ້າທີ່ແພງຜິດປົກກະຕິ, ບັນຫາທີ່ສົງໃສກ່ຽວກັບການຈົດເລກໝໍ້ນັບໄຟຜິດ, ບັນຫາທີ່ກ່ຽວຂ້ອງກັບ ການຊົມໄຊ້ໄຟຟ້າ ແລະ ບໍລິການ.

ໃນໄລຍະ 15 ວັນຂອງການເປີິດຈຸດບໍລິການ ມີຜູ້ຊົມໃຊ້ໄຟຟ້າເຂົ້າມາໃຊ້ ບໍລິການ ຈໍານວນ 1.375 ລູກຄ້າ, ໃນນີ້ມີລູກຄ້າທີ່ນໍາໃຊ້ລະບົບ Smart Meter ຈຳນວນ 185 ລູກຄ້າ. ບັນຫາທີ່ໄດ້ຮັບການແກ້ໄຂປະກອບດ້ວຍ: ການແກ້ໄຂບັນຫາໄຟຟ້າແພງຜິດປົກກະຕິ ຊິ່ງໄດ້ດໍາເນີນການ ກວດກາພະລັງງານຊົມໃຊ້ຕົວຈິງ ພ້ອມທັງອະທິບາຍໃຫ້ລູກຄ້າເຂົ້າໃຈກ່ຽວກັບການປະຕິບັດລາຄາໄຟຟ້າໃໝ່ 930 ລູກຄ້າ ແລະ ຍິນດີຊໍາລະຄ່າໄຟຟ້າ 339 ລູກຄ້າ;

ກວດກາໝໍ້ນັບໄຟ ຕາມຄໍາສະເໜີ ຂອງ ລູກຄ້າ 391 ຄັ້ງ; ດັດແກ້ພະລັງງານ 99 ລູກຄ້າ. ບັນຫາໄຟຟ້າບໍ່ພໍຊົມໃຊ້, ບັນຫາໄຟຟ້າມັກຕົກ, ທີມງານໄດ້ບັນທຶກຂໍ້ມູນ ສົ່ງໃຫ້ສູນບໍລິການຢູ່ເຂດທີ່ເກີດບັນຫາ ເພື່ອສົມທົບກັບອົງການປົກຄອງທ້ອງຖິ່ນທໍາການສຶກສາ ແລະ ສ້ອມແປງ.

ເພື່ອອໍານວຍຄວາມສະດວກໃຫ້ຜູ້ຊົມໄຊ້ໄຟຟ້າສາມາດເຂົ້າເຖິງການບໍລິການ, ທັງເປັນການສືບຕໍ່ແກ້ໄຂ ບັນຫາກ່ຽວກັບໄຟຟ້າ, ລັດວິສາຫະກິດໄຟຟ້າລາວ ໄດ້ເປີດຈຸດຮັບຄໍາຮ້ອງແກ້ໄຂບັນຫາໄຟຟ້າ ແລະ ການບໍລິການ ຢູ່ ສູນບໍລິການໄຟຟ້າ 09 ຕົວເມືອງ ຂອງ ນະຄອນຫຼວງວຽງຈັນ.

ສະນັ້ນ, ທຸກຂໍ້ຂ້ອງໃຈກ່ຽວກັບໄຟຟ້າ ທ່ານ ສາມາດສອບຖາມໄດ້ທີ່ສູນບໍລິການໃກ້ບ້ານຂອງທ່ານໃນໂມງລັດຖະການ ຫລື ໂທລະສັບສາຍດ່ວນ ຟຟລ 1199 ຕະຫລອດ 24 ຊົ່ວໂມງ ແລະ ອີດີແອວ ໂມບາຍ ແອບພຣີເຄຊັ່ນ ( EDL Mobile Application) ເພື່ອຕິດຕາມທຸກຂໍ້ມູນກ່ຽວກັບການໃຊ້ພະລັງງານໄຟຟ້າ ແລະ ການບໍລິການ ຂອງ ລັດວິສາຫະກິດໄຟຟ້າລາວ.

Related Posts

Leave a Reply

Your email address will not be published. Required fields are marked *