ຫລາຍບ້ານຢູ່ແຂວງຫລວງນ້ຳທາ ປະສົບໄພນ້ຳຖ້ວມເກີນເຂດອັ ນຕະ ລາ ຍແລ້ວ

ອຸຕຸນິຍົມ ແລະ ອຸທົກກະສາດ ແຂວງຫລວງນ້ຳທາ ລາຍງານໃຫ້ຮູ້ວ່າ: ເນື່ອງຈາກສະພາບອາກາດມີຝົນຕົກໜັກ ແຕ່ວັນທີ 19-21 ກໍລະກົດ 2021 ນີ້ ເຮັດໃຫ້ມີນໍ້າປ່າໄຫລຊຸ, ນໍ້າຖ້ວມອັ່ງ, ດິນເຈື່ອນ, ນໍ້າປ່າໄຫລນອງ ເຊິ່ງເປັນສາເຫດເຮັດໃຫ້ສາຍນໍ້າຕ່າງໆມີລະດັບນໍ້າເພີ່ມຂຶ້ນຢ່າງວ່ອງໄວ.

ຮອດເວລາ 8:30 ໂມງ ຂອງວັນທີ 21 ກໍລະກົດນີ້ ລະດັບນໍ້າທາ ວັດແທກໄດ້ 7,92 ແມັດ ຊຶ່ງກາຍເຂດອັນຕະລາຍແລ້ວ (ເຂດອັນຕະລາຍ 7,50 ແມັດ), ເຊິ່ງເຮັດໃຫ້ນໍ້າທາລົ້ນຝັ່ງຢູ່ ເຂດບ້ານໃໝ່, ບ້ານຂອນ, ບ້ານຫລວງ, ບ້ານວຽງໃຕ້, ບ້ານປ່າສັກ ແລະ ບ້ານອື່ນໆທີ່ຢູ່ລຽບສາຍນໍ້າທາ. ປັດຈຸບັນລະດັບນໍ້າຍັງເພີ່ມສູງຂຶ້ນເລື້ອຍໆ ເນື່ອງຈາກສະພາບອາກາດຍັງມີຝົນຕົກກະຈາຍຢູ່ທົ່ວໄປ ໃນທົ່ວແຂວງ.

ສະນັ້ນ, ຈຶ່ງແຈ້ງເຕືອນມາຍັງພໍ່ແມ່ປະຊາຊົນ ທີ່ອາໃສຢູ່ລຽບແຄມນໍ້າ ເປັນຕົ້ນແຄມນໍາທຸງ, ນໍ້າທາ, ນໍ້າມະ, ນໍ້າຂອງ ແລະ ສາຍນໍ້າອື່ນໆ ຈົ່ງມີສະຕິລະມັດລະວັງຕໍ່ສະພາບນໍ້າປ່າໄຫລນອງ ແລະ ນໍ້າຖ້ວມພື້ນທີ່ຕໍ່າ ແລະ ອື່ນໆ ເຊິ່ງອາດສົ່ງຜົນກະທົບຕໍ່ຊີວິດ ແລະ ຊັບສິນ. ເພື່ອປ້ອງກັນຜົນກະທົບທີ່ອາດເກີດຂຶ້ນ, ຄວນເກັບເຄື່ອງຂອງໄປໄວ້ໃນທີ່ປອດໄພ ແລະ ຈົ່ງຕິດຕາມການລາຍງານສະພາບອາກາດຈາກ ກົມອຸຕຸນິຍົມ ແລະ ອຸທົກກະສາດ ຫລື ອຸຕຸນິນົມ ແລະ ອຸທົກກະສາດ ແຂວງຫລວງນໍ້າທາ ຈະລາຍງານເປັນປະຈໍາ.

ນອກນີ້, ທ່ານ ຍວງ ຮອງນາຍບ້ານ ນ້ຳເງິນ ເມືອງວຽງພູຄາ ແຂວງຫລວງນ້ຳທາ ໃຫ້ຮູ້ວ່າ: ຈາກສະພາບນ້ຳຖ້ວມໄຫລຊຸ ໄດ້ເຮັດໃຫ້ຖ້ວມນາຂອງປະຊາຊົນບ້ານນ້ຳເງິນເສຍຫາຍຫລາຍກວ່າ 10 ເຮັກຕາ ແລະ ລະດັບນ້ຳຍັງສືບຕໍ່ເພີ່ມຂຶ້ນເລື້ອຍໆ ເຊິ່ງຈະຕ້ອງໄດ້ເຝົ້າລະວັງ ແລະ ມີຄວາມກຽມພ້ອມເພື່ອຮັບມືກັບສະພາບດັ່ງກ່າວຢູ່ສະເໝີ.

Related Posts

Leave a Reply

Your email address will not be published.