ຖ້າຮັກຊາດຕ້ອງກັກກັນຕົນເອງ

ໂດຍ: ທິດກ່ຳ

ຊ່ວງໄລຍະນີ້ ຕ້ອງຍອມຮັບວ່າແຮງງານລາວທີ່ໄປເຮັດວຽກຢູ່ປະເທດໄທຫລາຍພັນຄົນໄດ້ພາກັນຫລັ່ງໄຫລກັບຄືນປະເທດ ອັນສາເຫດກໍຍ້ອນວ່າຢູ່ປະເທດໄທມີການແຜ່ລະບາດພະຍາດໂຄວິດ-19 ຢ່າງໜັກໜ່ວງ ແລະ ໜ້າວິຕົກ. ປັດຈຸບັນສະພາບຄົນຕິດໂຄວິດ-19 ລົ້ນໂຮງໝໍ ແຖມຍັງມີຄົນເສຍຊີວິດຕາມຖະໜົນຫົນທາງ ແລະ ສະຖານທີ່ສາທາລະນະ.

ຈາກສາເຫດດັ່ງກ່າວ, ເພື່ອຮັກສາຊີວິດອິນຊີຂອງຕົນໃຫ້ປອດໄພ ຈຶ່ງເຮັດໃຫ້ຄົນລາວສ່ວນຫລາຍທີ່ໄດ້ໄປອອກແຮງງານຢູ່ໄທຫລາຍພັນຄົນຈຳຕ້ອງແຫ່ກັບບ້ານ ເພື່ອເອົາຊີວິດລອດ. ສິ່ງທີ່ໜ້າວິຕົກກັງວົນທີ່ສຸດກໍຄືໃນຈຳນວນແຮງງານກັບຄືນບ້ານນີ້ ເກືອບ 50% ແມ່ນພາກັນຕິດເຊື້ອໂຄວິດ ແລະ ໃນຈຳນວນຜູ້ຕິດເຊື້ອນີ້ 35% ແມ່ນຕິດເຊື້ອສາຍພັນເດວຕາ.

ແນວໃດກໍຕາມ, ໃນຈຳນວນແຮງງານທີ່ກັບຄືນບ້ານນີ້ສ່ວນໃຫຍ່ແມ່ນໄປ ແລະ ກັບແບບຖືກຕ້ອງຕາມກົດໝາຍ ແລະ ມີຈຳນວນໜ້ອຍໜຶ່ງລັກຂ້າມໄປ-ມາແບບບໍ່ຖືກຕ້ອງ. ຈາກສະພາບເກີດຂຶ້ນນີ້ ຫລາຍຄົນກໍໜ້າເປັນຫ່ວງຢ້ານເຊື້ອພະຍາດໂຄວິດ-19 ມີການລະບາດຮອບສາມຮອບສີ່ ນອກຈາກນັ້ນ ນັບແຕ່ມື້ມີແຮງງານລາວແຫ່ກັບຄືນປະເທດຈາກໄທມີຄົນຕິດເຊື້ອນຳເຂົ້າແຕ່ລະວັນມີເຖິງຫລັກ 100 ໂດຍສະເລ່ຍ.

– ຖ້າຮັກຊາດຕ້ອງກັກກັນຕົນເອງຈາກສະພາບທີ່ເກີດຂຶ້ນໄລຍະນີ້ ດ້ວຍຄວາມເປັນຫ່ວງເປັນໃຍຂອງພັກ ແລະ ລັດຖະບານ , ທ່ານ ພັນຄຳ ວິພາວັນ ກຳມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ ໄດ້ເດີນທາງໄປກວດກາ ທັງຢ້ຽມຢາມສູນກັກກັນແຮງງານລາວພາກສະໜາມທີ່ແຂວງຈຳປາສັກ ແລະ ແຂວງສະຫວັນນະເຂດ ພ້ອມຊ່ວຍເຫລືອເງິນຢຽວຢາໃຫ້ບັນດາແຂວງພາກໃຕ້ ແຂວງລະ 150 ລ້ານກີບ ເປັນຕົ້ນແຂວງຈຳປາສັກ, ສາລະວັນ, ເຊກອງ ແລະ ອັດຕະປື ເພື່ອສູ້ກັບການລະບາດຂອງພະຍາດໂຄວິດ-19.

ນອກຈາກນັ້ນ, ໄປພ້ອມໆກັບໄລຍະການກັບຄືນຖິ່ນຂອງແຮງງານລາວ, ນາຍົກເຮົາຍັງຮຽກຮ້ອງໃຫ້ແຮງງານທີ່ໄດ້ໄປອອກແຮງງານຢູ່ໄທຈົ່ງກັບຄືນປະເທດໃຫ້ຖືກຕ້ອງ ຢ່າພາກັນລັກຂ້າມຂອງແບບບໍ່ຖືກຕ້ອງ, ເມື່ອຂ້າມມາແລ້ວຕ້ອງເຂົ້າສູນກັກກັນ ເພື່ອຕິດຕາມກວດກາອາການ. ຜູ້ທີ່ຕິດເຊື້ອກໍປິ່ນປົວຈົນກວ່າຫາຍດີແລ້ວຈຶ່ງກັບເມືອຫາຄອບຄົວ, ທຸກຄົນແມ່ນໃຫ້ປະຕິບັດຄົບຖ້ວນທົ່ວເຖິງ ຈຶ່ງຖືວ່າຜູ້ນັ້ນຮັກປະເທດຊາດ ແລະ ຮັກຄອບຄົວ. ທ່ານນາຍົກກ່າວ.

Related Posts

Leave a Reply

Your email address will not be published.