ການສໍ້ລາດບັງຫລວງຄືປວກເຈາະໄມ້ ຄືມອດເຈາະເຮືອນ

ໂດຍ: ທິດກໍ່າ

ໃນກອງປະຊຸມສະໄໝສາມັນຄັ້ງທີ 2 ຂອງສະພາແຫ່ງຊາດ ຊຸດທີ IX ເຊິ່ງໄດ້ໄຂຂຶ້ນແຕ່ວັນທີ 1-17 ພະຈິກ 2021 ທີ່ຜ່ານມາ, ໃນລະຫວ່າງການດຳເນີນກອງປະຊຸມ ບັນດາ ສສຊ ໄດ້ປະກອບຄຳຄິດຄຳເຫັນຢ່າງເຄັ່ງຮ້ອນ ທັງມີຄວາມໝາຍ ແລະ ພາຍໃຕ້ບັນຍາກາດອັນດີ.

ໃນກອງປະຊຸມສະພາຄັ້ງນີ້ ໜຶ່ງໃນບັນຫາໂດດເດັ່ນທີ່ ສສຊ ໄດ້ສະເໜີໃຫ້ລັດຖະບານຈົ່ງໃຊ້ມາດຕະການຂັ້ນເດັດຂາດນັ້ນ ກໍຄືບັນຫາການສໍ້ລາດບັງຫລວງ ເຊິ່ງມາຮອດປັດຈຸບັນ ເຖິງວ່າມີການກວດກາພົບເຫັນຢູ່ໄຈ້ໆ ແຕ່ກໍຍັງບໍ່ທັນສາມາດປາບປາມພວກຈັງໄຮເຫລົ່ານີ້ໃຫ້ໝົດໄປຈາກສັງຄົມລາວໄດ້ໝົດເທື່ອ.

ອັນສາເຫດທີ່ທາງ ສສຊ ໄດ້ສະເໜີຕໍ່ລັດຖະບານໃຫ້ໃຊ້ມາດຕະການຂັ້ນເດັດຂາດຕໍ່ພວກນີ້ ກໍຍ້ອນວ່າພະຍາດສໍ້ລາດບັງຫລວງມັນອັນຕະລາຍຮ້າຍແຮງ ເຊິ່ງບໍ່ຕ່າງຫຍັງກັບປວກເຈາະໄມ້ຄືມອດເຈາະເຮືອນ ຖ້າປະປ່ອຍໄປດົນນານເທົ່າໃດ ໄມ້ກໍຈະໂດກຫັກ ເຮືອນກໍເພພັງ

ຍ້ອນປວກກັດປວກແຫ້ນ ຖ້າສົມທຽບໃສ່ຄວາມເສຍຫາຍຂອງປະເທດຊາດກໍແມ່ນເຮັດໃຫ້ພະນັກງານເສຍຄຸນທາດການເມືອງ, ເຮັດໃຫ້ອົງການຈັດຕັ້ງພັກ-ລັດອ່ອນເພຍເປ້ຍລ່ອຍ ຮ້າຍແຮງກວ່ານັ້ນ ແມ່ນຈະເຮັດໃຫ້ເສດຖະກິດ-ສັງຄົມຂອງປະເທດລ້າຫລັງ, ຫລຸດຖອຍ ແລະ ລົ້ມຈົມຍ້ອນຄວາມເຫັນແກ່ຕົວຂອງພວກສໍ້ລາດບັງຫລວງ.

ຈາກການລາຍງານຂອງທ່ານ ສອນໄຊ ສີພັນດອນ ລັດຖະມົນຕີກະຊວງແຜນການ ແລະ ການລົງທຶນ ໄດ້ຊີ້ແຈງຕໍ່ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ວ່າ:

ໄດ້ກວດກາພົບເຫັນມູນຄ່າໂຄງການທີ່ບໍ່ສອດຄ່ອງເຖິງ 1.781 ລ້ານກວ່າກີບ, ພົບເຫັນເປັນເງິນໂດລາ 383.000 ກວ່າໂດລາສະຫະລັດ. ນອກນັ້ນ ໃນວັນທີ 5 ພະຈິກ 2021 ໂອກາດກອງປະຊຸມສະພາຄັ້ງນີ້, ທ່ານ ຄຳພັນ ພົມມະທັດ ປະທານອົງການກວດກາແຫ່ງລັດ ກໍໄດ້ລາຍງານຕໍ່ກອງປະຊຸມສະພາວ່າ:

ສາມາດກວດກາພົບເຫັນການສໍ້ລາດບັງຫລວງ 10 ເປົ້າໝາຍ ມີມູນຄ່າເສຍຫາຍຫລາຍກວ່າ 643 ຕື້ກີບ, 384 ກວ່າລ້ານບາດ ແລະ 23 ລ້ານກວ່າໂດລາສະຫະລັດ. ນີ້ຄືຜົນເສຍຫາຍຈາກບຸກຄົນກຸ່ມຄົນ ເຊິ່ງຍາມໃດກໍບໍ່ລົດລະແນວຄິດສໍ້ໂກງກິນເງິນພັກເງິນລັດດ້ວຍວິທີການ ແລະ ຮູບການຕ່າງໆ ອັນເປັນຊັບສິນລວມຂອງປະເທດຊາດບ້ານເມືອງ.

ຢ່າງໃດກໍດີ, ເມື່ອເອີ່ຍເຖິງວິທີການ ແລະ ຮູບການແກ້ໄຂ ບໍ່ໃຫ້ມີການສໍ້ລາດບັງຫລວງນັ້ນມັນກໍມີຫລາຍປັດໄຈ ຕົວຢ່າງບາງປະເທດເມື່ອກວດກາພົບເຫັນມີມູນຄ່າຫລວງຫລາຍ ທັງມີຂໍ້ມູນຮັດກຸມ ຜູ້ກະທຳຜິດຍອມຮັບສາລະພາບເຂົາກໍປະຫານຊີວິດຕາມກົດໝາຍບ້ານເຂົາ.

ສ່ວນຢູ່ບ້ານເຮົາແມ່ນຍັງເຮັດແບບລະອຽດອ່ອນ ບົວບໍ່ຊ້ຳນ້ຳບໍ່ຂຸ້ນ ເວົ້າຢ່າງໜຶ່ງແມ່ນຂ້າພະຍາດກູ້ເອົາຄົນ ໂດຍຂັ້ນຕົ້ນແມ່ນກ່າວເຕືອນ, ສຶກສາອົບຮົມ ຖ້າບໍ່ປ່ຽນແປງກໍຂຽນໃບສຳຫລວດປະຕິຍານຕົນເອງ ຖ້າຍັງໜັກກວ່ານັ້ນຈຶ່ງປະຕິບັດວິໄນໃສ່ໂທດຕາມກໍລະນີໜັກ ຫລື ເບົາ.

ເພາະສະນັ້ນ ໃນເມື່ອກວດກາພົບເຫັນມີຂໍ້ມູນຮັດກຸມແລ້ວ ກໍມອບໃຫ້ຄະນະພັກຢູ່ບ່ອນນັ້ນເປັນຜູ້ແກ້ໄຂ ຖ້າບໍ່ສາມາດແກ້ກໍສະເໜີຂັ້ນເທິງຖັດໄປແກ້, ເຮັດໃຫ້ຂັ້ນຕອນແກ່ຍາວ ເມື່ອເປັນຄືດັ່ງວ່ານີ້ຈຶ່ງເຮັດໃຫ້ພວກດື້ດ້ານຫົວແຂງບໍ່ເຂັດຫລາບ ພາໃຫ້ເກີດມີການກະທຳຜິດຕໍ່ເນື່ອງແຜ່ລາມ. ດັ່ງກອງປະຊຸມສະພາແຕ່ລະຄັ້ງໄດ້ສະຫລຸບຕົວເລກມາໃຫ້ເຫັນ ເຊິ່ງເບິ່ງຢ່າງໜຶ່ງແລ້ວໃຜກໍເຮັດຕາມໜ້າທີ່ຄື:

ຜູ້ມີໜ້າທີ່ກວດກໍກວດໄປເລື້ອຍໆ ຜູ້ມີໜ້າທີ່ແກ້ກໍແກ້ ແລະ ຜູ້ມີໜ້າທີ່ກິນກໍເຮັດຫູໜວກກິນຟານໄປເລື້ອຍໆ ຈຶ່ງເຮັດໃຫ້ການແກ້ໄຂບັນຫາບໍ່ສຸດສ້ຽງ ແລະ ເກີດມີການສໍ້ລາດບັງຫລວງຕະຫລອດ.

Related Posts

Leave a Reply

Your email address will not be published.