ຜູ້ນຳສູງສຸດ ລາວ-ຈີນ ຮ່ວມພິທີເປີດນໍາໃຊ້ທາງລົດໄຟ ລາວ – ຈີນ ຢ່າງເປັນທາງການ

ໃນວັນທີ 3 ທັນວາ 2021, ທີ່ນະຄອນຫລວງວຽງຈັນ ໄດ້ມີພິທີເປີດນໍາໃຊ້ທາງລົດໄຟ ລາວ-ຈີນ ຢ່າງເປັນທາງການຢ່າງສະຫງ່າຜ່າເຜີຍຜ່ານລະບົບທາງໄກ ເພື່ອເປັນຂອງຂວັນ ໃຫ້ແກ່ວັນສະຖາປະນາ ສປປ ລາວ ຄົບຮອບ 46 ປີ ແລະ ປະກອບສ່ວນເຂົ້າໃນການສະເຫລີມສະຫລອງຄົບຮອບ 60 ປີ ຂອງການສ້າງຕັ້ງສາຍພົວພັນການທູດລາວ-ຈີນ ຢ່າງມີຄວາມໝາຍເລິກເຊິ່ງ

ໂດຍການເຂົ້າຮ່ວມຂອງ ທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ ແລະ ທ່ານ ສີຈິ້ນຜິງ ປະທານປະເທດ ແຫ່ງ ສປ ຈີນ ໂດຍມີການນຳຂັ້ນສູງ, ອະດີດການນຳຂັ້ນສູນ ຂອງສອງປະເທດເຂົ້າຮ່ວມ ແລະ ຍັງມີບັນ ດາທຸຕານຸທູດ, ບັນດາຜູ້ຕາງໜ້າອົງການຈັດຕັ້ງສາກົນເຂົ້າຮ່ວມ.

ພິທີເປີດນຳໃຊ້ທາງລົດໄຟ ລາວ-ຈີນ ຢ່າງເປັນທາງການ ໄດ້ຈັດຂຶ້ນໃນຮູບແບບອອນລາຍ ທີ່ຫໍປະຊຸມແຫ່ງຊາດລາວ, ສະຖານີລົດໄຟນະຄອນຫລວງວຽງຈັນ ແລະ ທີ່ ສປ ຈີນ ເຊິ່ງໃນພິທີ ທ່ານ ເຫີ ລີ ເຟິ່ງ ປະທານກຸ່ມບໍລິສັດທາງລົດໄຟ ສປ ຈີນ ແລະ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີ ກະຊວງແຜນການ ແລະ ການລົງທຶນ ຜູ້ຊີ້ນຳການກໍ່ສ້າງທາງລົດໄຟ ລາວ-ຈີນ ຂອງຝ່າຍລາວ ໄດ້ພັດປ່ຽນກັນລາຍງານສະພາບການກະກຽມເປີດທາງລົດໄຟ.

ຈາກນັ້ນ, ຜູ້ເຂົ້າຮ່ວມ ກໍໄດ້ພ້ອມກັນຮັບຊົມວິດີໂອ ກ່ຽວກັບທາງລົດໄຟ ລາວ-ຈີນ.ໂອກາດທີ່ມີຄວາມໝາຍສຳຄັນນີ້, ທ່ານ ທອງລຸນ ສີສຸລິດ ໄດ້ຂຶ້ນກ່າວຄຳປາໄສ ໂດຍມີບາງຕອນສຳຄັນວ່າ: ພິທີເປີດນຳໃຊ້ເສັ້ນທາງລົດໄຟ ລາວ-ຈີນ ເປັນພິທີ ທີ່ມີຄວາມໝາຍສຳຄັນທາງປະຫວັດສາດ ທີ່ເປັນການເປີດສັກກະລາດໃໝ່ ແຫ່ງການພັດທະນາພື້ນຖານໂຄ່ງລ່າງ ທີ່ທັນສະໄໝຂອງ ສປປ ລາວ ເປັນຄວາມເອກອ້າງທະນົງໃຈ ທີ່ເຮັດໃຫ້ຄວາມຝັນ, ຄວາມຄ່ອງຄ່ອຍຂອງປະຊາຊົນລາວ ປະກົດຜົນເປັນຈິງ, ສຳຄັນອີກອັນໜຶ່ງໂຄງການນີ້,

ຍັງເປັນສັນຍາລັກທາງປະຫວັດສາດທີ່ສຳຄັນ ໃຫ້ແກ່ສາຍພົວພັນລະ ຫວ່າງ ສອງພັກ ສອງລັດ ແລະ ປະຊາຊົນສອງຊາດ ລາວ-ຈີນ, ສປປ ລາວ ໃຫ້ການສະໜັບສະໜູນຢ່າງສະເໝີຕົ້ນສະເໝີປາຍ ແລະ ຕັ້ງໜ້າເຂົ້າຮ່ວມຜັນຂະຫຍາຍຂໍ້ລິເລີ່ມໜຶ່ງເລວໜຶ່ງເສັ້ນທາງ ຂອງ ສະ ຫາຍ ສີຈິ້ນຜິງ ປະທານປະເທດແຫ່ງ ສປ ຈີນ ເຊິ່ງ ສປປ ລາວ ກໍເປັນຜູ້ໄດ້ຮັບຜົນປະໂຫຍດໂດຍກົງ ຈາກນະໂຍບາຍ ແລະ ຂໍ້ລິເລີ່ມນີ້ຢ່າງແທ້ຈິງ, ໂຄງການທາງລົດໄຟລາວ-ຈີນ

ເປັນໂຄງການຮ່ວມມືທາງດ້ານຍຸດທະສາດສຳຄັນ ໃນການພັດທະນາຂອງສອງປະເທດ ແລະ ເປັນກຳລັງແຮງໃຫ້ແກ່ ສປປ ລາວ ໃນການປະຕິບັດຍຸດທະສາດ ຫັນປະເທດທີ່ບໍ່ມີຊາຍແດນຕິດກັບທະເລ ໄປສູ່ການເປັນປະເທດເຊື່ອມໂຍງເຊື່ອມຈອດຂອງພາກພື້ນໃຫ້ເປັນຮູບປະທຳ;

ພ້ອມນີ້ ໂຄງການທາງລົດໄຟລາວ-ຈີນ ເປັນຂອງຂວັນອັນລ້ຳຄ່າ ໃຫ້ແກ່ປະຊາຊົນລາວ ໃນໂອກາດສະເຫລີມສະຫລອງ ວັກສະຖາປະນາ ສປປ ລາວ ຄົບຮອບ 46 ປີ ປະກອບສ່ວນເຂົ້າໃນການສະເຫລີມສະຫລອງຄົບຮອບ 60 ປີ ຂອງການສ້າງຕັ້ງສາຍພົວພັນການທູດລາວ-ຈີນ ຢ່າງມີຄວາມໝາຍເລິກເຊິ່ງ ໝາກຜົນຂອງຄວາມສຳເລັດນີ້ ລ້ວນແຕ່ສະແດງໃຫ້ເຫັນເຖິງຈິດໃຈ ການເປັນຄູ່ຮ່ວມມືຍຸດທະສາດໝັ້ນຄົງຍາວນານຕາມທິດ 4 ດີ ແລະ ເປັນສັນຍາລັກທີ່ສໍາຄັນໃນການສ້າງຄູ່ຮ່ວມຊາຕາກຳຮ່ວມກັນ ລາວ-ຈີນ, ຈີນ-ລາວ ທີ່ນຳເອົາຜົນປະໂຫຍດຕົວຈິງມາສູ່ປະຊາຊົນທັງສອງປະ ເທດ.

ພ້ອມນີ້, ທ່ານ ສີຈິ້ນຜິງ ກໍໄດ້ກ່າວປາໄສ ໂດຍມີບາງຕອນວ່າ: ໃນປີ 2015, ຈີນ-ລາວ ໄດ້ບັນລຸຂໍ້ຕົກລົງອັນຍິ່ງໃຫຍ່ດ້ານການຮ່ວມມື ກໍ່ສ້າງເສັ້ນທາງລົດໄຟ ຈີນ-ລາວ, ເຊິ່ງ 5 ປີມານີ້, ສອງຝ່າຍໄດ້ຮ່ວມຈິດຮ່ວມໃຈປະສານສົມທົບຢ່າງໃກ້ຊິດ ດ້ວຍການທຸບພູ, ສ້າງທາງ, ຂົວຂ້າມນໍ້າ ສຳເລັດໜ້າທີ່ການກໍ່ສ້າງຢ່າງມີຄຸນນະພາບສູງ ເຊິ່ງການຮ່ວມມືຕົວຈິງດັ່ງກ່າວໄດ້ສ່ອງແສງເຖິງຜົນຮັບຂອງສອງປະເທດ ທີ່ສ້າງຜົນປະໂຫຍດໃຫ້ແກ່ກັນ. ພາຍຫລັງລົດໄຟ ຈີນ-ລາວ ເປີດນຳໃຊ້ ແລະ ເຊື່ອມຈອດກັບລົດໄຟຈີນແລ້ວ ແຕ່ນະຄອນຄຸນມິງ ຫາ ນະຄອນຫລວງວຽງຈັນ ພູຜາຈະບໍ່ສູງອີກ, ຫົນທາງຈະບໍ່ຍາວອີກ.

ຕໍ່ໜ້ານີ້, ສອງຝ່າຍຕ້ອງໄດ້ສືບຕໍ່ສູ້ຊົນພະຍາຍາມຮ່ວມກັນ ຮັກສາ ແລະ ນຳໃຊ້ລົດໄຟ, ກໍ່ສ້າງພັດທະນາແລວທາງລົດໄຟໃຫ້ໄດ້ດີ ເພື່ອສ້າງເສັ້ນທາງລົດໄຟ ເປັນເສັ້ນທາງເງິນ-ຄຳ, ນຳເອົາຜົນປະໂຫຍດມາຍັງປະຊາຊົນທັງສອງຊາດ.

ເສັ້ນທາງລົດໄຟ ຈີນ-ລາວ ເປັນສັນຍາລັກຂອງການກໍ່ສ້າງ ໜຶ່ງແລວໜຶ່ງເສັ້ນທາງ ເຊິ່ງຝ່າຍຈີນໄດ້ຕັ້ງເປົ້າໝາຍທີ່ມີມາດຕະຖານສູງ, ພັດທະນາແບບຍືນຍົງ ແລະ ສ້າງຜົນປະໂຫຍດໃຫ້ປະຊາຊົນ, ສືບຕໍ່ຊຸກຍູ້ລະດັບການຮ່ວມມື ໜຶ່ງແລວໜຶ່ງເສັ້ນທາງ ທີ່ເປັນການສ້າງໂອກາດໃໝ່ໃຫ້ການພັດທະນາເສດຖະກິດໂລກ ແລະ ພາໃຫ້ປະເທດທີ່ເຂົ້າຮ່ວມ ຕາງຝ່າຍຕາງໄດ້ຮັບຜົນປະໂຫຍດ ປິ່ນໜ້າສູ່ອານາຄົດ.

ຈີນ ຍິນດີທີ່ຈະຮ່ວມກັບປະເທດລາວ ແລະ ບັນດາປະເທດລຽບຕາມເສັ້ນທາງ ພ້ອມກັນເລັ່ງລັດສ້າງສາຍພົວພັນ ການຮ່ວມມືໜຶ່ງແລວໜຶ່ງເສັ້ນທາງທີ່ແໜ້ນແຟ້ນກວ່າເກົ່າ ແລະ ພ້ອມກັນຊຸກຍູ້ສ້າງສາຄູ່ຮ່ວມສະຕາກຳຂອງມວນມະນຸດ. ອະນາຄົດມິດຕິພາບຂອງ ຈີນ-ລາວ, ລາວ-ຈີນ ຢູ່ນຳໄວໜຸ່ມ, ການເຊື່ອມໂຍງ-ເຊື່ອມຈອດພື້ນຖານໂຄງລາງ ສຳຄັນແມ່ນຕ້ອງໃຫ້ຈິດໃຈປະຊາຊົນສະໜິດສະໜົມ ເຊິ່ງຈີນຈະສືບຕໍ່ຊ່ວຍ ສປປ ລາວ ສ້າງສາບຸກຄະລາກອນ ແລະ ສ້າງຊັບພະຍາກອນມະນຸດ ເພື່ອສືບທອດມິດຕະພາບສອງຊາດ.

ພາຍຫລັງຜູ້ນຳຂັ້ນສູງຂອງສອງປະເທດ ລາວ-ຈີນ ກ່າວຄຳປາໄສ, ຫົວໜ້າສະຖານີລົດໄຟນະ ຄອນຫລວງວຽງຈັນ ໄດ້ຂໍຄຳສັ່ງເຄື່ອນລົດໄຟ ຈາກ ທ່ານປະທານປະເທດ ແຫ່ງ ສປປ ລາວ ແລະ ທ່ານ ທອງລຸນ ສີສຸລິດ ກໍໄດ້ສັ່ງໃຫ້ລົດໄຟອອກເດີນທາງ.

ພ້ອມກັນນັ້ນ, ຫົວໜ້າສະຖານີລົດໄຟ ນະຄອນຄຸນມິງ ກໍໄດ້ຂໍຄຳສັ່ງເຄື່ອນລົດໄຟ ຈາກທ່ານປປະທານປະເທດ ແຫ່ງ ສປ ຈີນ ແລະ ທ່ານ ສີຈິ້ນຜິງ ກໍໄດ້ສັ່ງໃຫ້ລົດໄຟອອກເດີນທາງ ອັນເປັນຂີດໝາຍສຳຄັນໃນການອອກເຄື່ອນຂະບວນ ເດີນທາງອອກຈາກສະ ຖານີ, ຊຶ່ງເປັນການເປີດລົດໄຟໂດຍສານ ຖ້ຽວປະຖົມມະລືກ ທີ່ເດີນທາງຈາກສະຖານີນະຄອນຫລວງວຽງຈັນ ນຳພາໂດຍ ທ່ານ ພັນຄຳ ວິພາວັນ ນາຍົກລັດຖະມົນຕີ ແຫ່ງ ສປປ ລາວ ໄປຍັງສະຖານີລົດໄຟດ່ານບໍ່ເຕ່ນ,

ເຊິ່ງທ່ານນາຍົກລັດຖະມົນຕີ ໄດ້ເດີນທາງເຖິງສະຖານີວັງວຽງ ໂດຍມີທ່ານເຈົ້າແຂວງວຽງຈັນ ໃຫ້ການຕ້ອນຮັບ ແລະ ໄດ້ຢ້ຽມຊົມສະຖານີ ແລະ ຂຶ້ນລົດໄຟຄັນໃໝ່ ເພື່ອກັບນະຄອນຫລວງວຽງຈັນ. ສ່ວນລົດໄຟທີ່ເຄື່ອນຈາກສະຖານີຄຸນມິງ, ສປ ຈີນ ກໍເດີນທາງມາຍັງດ່ານຊາຍແດນບໍ່ເຕ່ນ, ສປປ ລາວ.

ຂ່າວ: ສົມຫວັງ ພາບ: ເກດສະໜາ

Related Posts

Leave a Reply

Your email address will not be published. Required fields are marked *