IMF ຊີ້ ທົ່ວໂລກກໍ່ໜີ້ສູງເຖິງ 226 ລ້ານລ້ານໂດລາ

ສຳ​ນັກ​ຂ່າວ​ເອ​ເອ​ຟ​ພີ​ລາຍ​ງານ​ວ່າ ກອງ​ທຶນ​ການ​ເງິນ​ລະ​ຫວ່າງ​ປະ​ເທດ (IMF) ໄດ້​ເປີດ​ເຜີຍ​ບົດ​ລາຍ​ງານ​ລະ​ບຸ​ວ່າ: ເມື່ອ​ປີ 2020 ຜ່ານ​ມາ ທົ່ວ​ໂລກ​ມີ​ໜີ​ສິນ​ລວ​ມ​ກັນ​ສູງ​ເຖິງ 226 ລ້ານ​ລ້ານ​ໂດ​ລາ ຫຼື 226 ພັນ​ຕື້​ໂດ​ລາ ເຊິ່ງ​ເປັນ​ການ​ເພີ່ມ​ຂຶ້ນ​ຕໍ່​ປີ​ສູງ​ທີ່​ສຸດ ນັບ​ແຕ່​ສົງ​ຄາມ​ໂລກ​ຄັ້ງ​ທີ 2 ເປັນ​ຕົ້ນ​ມາ ແລະ ຄິດ​ເປັນ​ສັດ​ສ່ວນ​ສູງ​ເຖິງ 256% ຂອງ GDP ໂລກ.

ສັດ​ສ່ວນ​ໜີ້​ທີ່​ເພີ່ມ​ຂຶ້ນຫຼາຍ​ທີ່​ສຸດ​ຄື​ໜີ້​ພາກ​ລັດ ເຊິ່ງ​ເພີ່ມ​ຂຶ້ນ​ສູ່​ລະ​ດັບ​ສູງ​ສຸດ​ເປັນ​ປະ​ຫວັດ​ການ​ເມື່ອ​ທຽບ​ກັບ ຈີ​ດີ​ພີ ​ໂດຍ​ຢູ່​ທີ່ 99% ຂອງ​ຈີ​ດີ​ພີ ໂດຍ​ໜີ້​ໃນ​ສ່ວນ​ນີ້​ປະ​ມານ 50% ຂອງ​ໜີ້​ທັງ​ໝົດ​ເພີ່ມ​ຂຶ້ນ​ເມື່ອ​ປີ​ຜ່ານ​ມາ, ສ່ວນ​ໜີ້​ພາກ​ຄົວ​ເຮືອນ​ກໍ​ເພີ່ມ​ຂຶ້ນ​ສູງ​ສຸດ​ເປັນ​ປະ​ຫວັດ​ການ​ເຊັ່ນ​ດຽວ​ກັນ.

ໄອ​ເອັມ​ເອ​ຟ​ລະ​ບຸ​ວ່າ ປັດ​ໄຈຫຼັກ​ໃນ​ການ​ກໍ່​ໜີ້​​ຂອງພາກ​ລັດ​ຂອງ​ບັນ​ດາ​ລັດ​ຖະ​ບານ​ແຕ່​ລະ​ປະ​ເທດ ເປັນ​ໄປ​ຕາມ​ນະ​ໂຍ​ບາຍ​ຕອບ​ສະ​ໜອງ​ແກ້​ໄຂວິ​ກິດ​ການ ທັງ​ວິ​ກິດ​ໂຄວິດ-19 ໃນ​ປີ 2020 ແລະ ວິ​ກິດ​ການ​ເງິນ​ໃນ​ປີ 2008, ໃນ​ປີ 2020 ລັດ​ຖະ​ບານ​ຈຳ​ເປັນ​ຕ້ອງ​ກໍ່​ໜີ້ ເພື່ອ​ນຳ​​ຊົດ​ເຊີຍ​ຜົນ​ກະ​ທົບ ມາ​ຮັກ​ສາ​ຕຳ​ແໜ່ງ​ການ​ຈ້າງ​ງານ ແລະ ຫຼີກ​ລຽງ​ກະ​ແສ​ການ​ລົ້ມ​ລະ​ລາຍ ຖ້າ​ຫາກວ່າ ລັດ​ຖະ​ບານ​ບໍ່​ດຳ​ເນີນ​ການ ຜົນ​ກະ​ທົບ​ຕໍ່​ເສດ​ຖະ​ກິດ ຈາກວິ​ກິດ​ໂຄວິດ ຍິ່ງ​ຮ້າຍ​ແຮງກວ່າ​ທີ່​ເປັນ​ຢູ່ຫຼາຍ​ເທົ່າ​ຕົວ.

ແນວ​ໃດ​ກໍ​ຕາມ ພາ​ລະ​ໜີ້​ສິນ​ເພີ່ມ​ຂຶ້ນ ກໍ​ຈະ​ເຮັດ​ໃຫ້​ລະ​ບົບ​ເສດ​ຖະ​ກິດບອບ​ບາງຫຼາຍ​ຂຶ້ນ ໂດຍ​ສະ​ເພາະ​ເມື່ອ​ນະ​ໂຍ​ບາຍ​ດ້ານ​ການ​ເງິນ​ເຂັ້ມ​ງວດ​ຂຶ້ນ ກໍ​ເປັນ​ການ​ຈຳ​ກັດ​ຄວາມ​ສາ​ມາດ​ຂອງ​ລັດ​ຖະ​ບານ​ໃນ​ການ​ກຳ​ນົດ​ນະ​ໂຍ​ບາຍ​ສະ​ໜັບ​ສະ​ໜູນ​ການ​ຟື້ນ​ຕົວ​ດ້ານ​ເສດ​ຖະ​ກິດ ແລະ ຈຳ​ກັດ​ສັກະ​ຍະ​ພາບ​ການ​ລົງ​ທຶນ​ຂອງ​ພາກ​ເອ​ກະ​ຊົນ​ໃນ​ໄລ​ຍະ​ກາງ.

ໄອ​ເອັມ​ເອ​ຟ​ລະ​ບຸ​ວ່າ: ປະ​ມານ 90% ຂອງ​ຈຳ​ນວນ​ໜີ້​ທີ່​ເພີ່ມ​ຂຶ້ນ​ເມື່ອ​ປີ 2020 ແມ່ນ​ໜີ້​ຂອງ​ປະ​ເທດ​ທີ່​ຮັ່ງ​ມີ ທັງ​ໜີ້​ຂອງ​ພາກ​ລັດ ແລະ ພາກ​ເອ​ກະ​ຊົນ, ໃນ​ຂະ​ນະ​ທີ່​ບັນ​ດາ​ປະ​ເທດ​ເສດ​ຖະ​ກິດ​ເກີດ​ໃໝ່ ແລະ ບັນ​ດາ​ປະ​ເທດ​ກຳ​ລັງ​ພັດ​ທະ​ນາສະ​ເລ່ຍ​ແລ້ວ​ກໍ່​ໜີ້​ບໍ່​ເຖິງ 1 ພັນ​ຕື້​ໂດ​ລາ​ຕໍ່​ປະ​ເທດ.

Related Posts

Leave a Reply

Your email address will not be published. Required fields are marked *