ກອງພົນທີ 2 ກວດກາຄັດເລືອກທະຫານໃໝ່ ສົກປີ 2021 ເຂົ້າລະບົບຄຸ້ມຄອງກຳລັງພົນກອງທັບ

ກອງພົນທີ 2 ກວດກາຄັດເລືອກທະຫານໃໝ່ສົກປີ 2021 ເຂົ້າລະບົບຄຸ້ມຄອງກຳລັງພົນກອງທັບ

ຂປລ.ໃນວັນທີ 24 ມັງກອນ 2022 ນີ້.ໜ່ວຍງານກວດກາຂັ້ນໜຶ່ງ ຂອງກະຊວງປ້ອງກັນປະເທດໄດ້ລົງກວດກາ ຄັດເລືອກ ທະຫານໃໝ່ ສົກປີ 2021 ເຂົ້າລະບົບຄຸ້ມຄອງກຳລັງພົນກອງທັບ ຢູ່ກອງພົນທີ 2 ເຊິ່ງນຳໂດຍ ສະຫາຍ ພັນເອກ ບຸນເພັງ ເທບພາພອນ ຮອງຫົວໜ້າກົມກຳລັງພົນກົມໃຫຍ່ເສນາທິການກອງທັບ ພ້ອມດ້ວຍຄະນະ, ມີອານຸກຳມະການຈາກອົງການ 5 ຫ້ອງຂອງກອງພົນ, ພະແນກການທີກ່ຽວຂ້ອງ ຕະຫລອດອ້າຍນ້ອງທະຫານໃໝ່ເຂົ້າຮ່ວມ.

ໂດຍປະຕິບັດຕາມກົດໝາຍພັນທະປ້ອງກັນຊາດ ແລະ ອີງຕາມຂໍ້ຕົກລົງຂອງກົມໃຫຍ່ເສນາທິການກອງທັບ ວ່າດ້ວຍການແບ່ງປັນຕົວເລກລະດົມພົນ ປະຈຳປີ 2021 ເຊິ່ງສາມາດລະດົມໄດ້ 160 ສະ ຫາຍ, ຍິງ 10 ສະຫາຍ ໃນນັ້ນ, ຜູ້ເຂົ້າເປັນທະຫານໃໝ່ ຕ້ອງເປັນຄົນລາວ ສັນຊາດລາວໂດຍກຳເນີດ ມີອາຍຸແຕ່ 18 ປີ ເຖິງ 25 ປີ, ມີລະດັບການສືກສາຈົບມັດທະຍົມຕອນປາຍຂຶ້ນໄປ ບໍ່ຈົບວິຊາສະເພາະກໍໄດ້ ຖ້າຈົບວິຊາສະເພາະ ຕ້ອງແມ່ນວິຊາສະເພາະທີ່ກອງທັບຕ້ອງການ ຄື ປຸງແຕ່ງອາຫານ, ກະສິກໍາ, ວິໄຈເຄມີ, ແພດ, ເຕັກນິກກົນຈັກ ແລະ ເຄຫາ ຈຶ່ງພິຈາລະນາຮັບເອົາ.

ພ້ອມກັນນັ້ນ ຮ່າງກາຍຕ້ອງບໍ່ສັກເມິກ ສັກລາຍ ເພດຊາຍບໍ່ບ່ອງຫູ ເພດຍິງບໍ່ບ່ອງຫູຫລາຍຮູ ບໍ່ບ່ອງດັງ ແລະ ເຮັດສັນຍາກຳຕ່າງໆ ລວງສູງເພດຊາຍ 1,60 cm, ເພດຍິງ 1,55 cm ຂຶ້ນໄປ ນ້ຳໜັກບໍ່ໃຫ້ລຸດ ຫລື ເກີນບວກ-ລົບ 10ຂອງສອງຕົວເລກທ້າຍລວງສູງຜູ້ກ່ຽວ ມີຄວາມເປັນເພດຈະແຈ້ງ ເປັນຊາຍແທ້ ຍິງແທ້ ຍົກເວັ້ນເຂົ້າສັງກັດຂະແໜງ ສີລະປະ ແລະ ກິລາທີ່ເປັນອາຊີບ ຕ້ອງເປັນໂສດ ບໍ່ມີຜົວ ຫລື ເມຍ ບໍ່ເຄີຍເປັນທະຫານ ຫລື ຕຳຫລວດມາກ່ອນ, ມີປະຫວັດຈະແຈ້ງ ບໍ່ເຄີຍຕ້ອງໂທດ ບໍ່ມີສານເສບຕິດໃນຮ່າງກາຍ ຕ້ອງປະຕິບັດຕາມການຊັບ ຊ້ອນຄັດເລືອກທະຫານໃໝ່.

ທັ້ງນີ້ ກໍເພື່ອກວດກາສຸຂະພາບຂອງທະຫານໃໝ່ ໃຫ້ມີຄວາມແຂງແຮງສົມບູນດີ ຄົບຕາມມາດ ຖານເຫງື່ອນໄຂທີ່ກະຊວງປ້ອງກັນປະເທດໄດ້ກຳນົດໄວ້ ເພື່ອຈະປະກອບບັນຈຸເຂົ້າໃນກຳລັງປະກອບອາ ວຸດຂອງກອງທັບ ໃນກຳລັງຫລວງ ແລະ ທ້ອງຖິ່ນ ກຽມພ້ອມເຄື່ອນໄຫວປະຕິບັດສອງໜ້າທີ່ຍຸດທະສາດ ກໍຄືປົກປັກຮັກສາ ແລະ ສ້າງສາພັດທະນາປະເທດຊາດ.

ໂດຍ ສຸວັນໂນ ທະລັງສີ

Related Posts

Leave a Reply

Your email address will not be published.