ແຈ້ງການ.! ຜູ້ອໍານວຍການໂຮງຮຽນ ຂໍຖືເປັນກຽດແຈ້ງມາຍັງຜູ້ປົກຄອງ ແລະ ນ້ອງນັກຮຽນຊັ້ນ ມ.4 ທັງໜົດ

ແຈ້ງການເຖິງ: ຜູ້ປົກຄອງ ແລະ ນ້ອງນັກຮຽນຊັ້ນ ມ.4 ທັງໜົດໂຮງຮຽນມັດທະຍົມສຶກສາສົມບູນວຽງຈັນ

ເລື່ອງ: ການເຂົ້າຮຽນພາກຮຽນທີ II ສົກຮຽນ 2021 – 2022 ແບບເຊິ່ງໜ້າ ສໍາລັບຊັ້ນ ມ.4

– ອີງຕາມ: ໜັງສືແຈ້ງຕອບຈາກຫ້ອງວ່າການ, ກອງເລຂາຄະນະສະເພາະກິດນະຄອນຫຼວງວຽງຈັນ ສະບັບເລກທີ 245/ຫວນວ, ລົງວັນທີ 27 ມັງກອນ 2022

– ອີງຕາມ: ແຜນພັດທະນາການຮຽນ-ການສອນ, ໂຮງຮຽນຕົວແບບຄຸນນະພາບໃນສົກຮຽນ 2021 – 2022

– ອີງຕາມ: ການຕົກລົງເຫັນດີຂອງຄະນະອໍານວຍການໂຮງຮຽນ ຄັ້ງວັນທີ 04 ກຸມພາ 2022

ຜູ້ອໍານວຍການໂຮງຮຽນ ຂໍຖືເປັນກຽດແຈ້ງມາຍັງຜູ້ປົກຄອງ ແລະ ນ້ອງນັກຮຽນຊັ້ນ ມ.4 ທັງໜົດຊາບວ່າ: ທາງໂຮງຮຽນຈະໄດ້ເປີດການຮຽນ-ການສອນແບບເຊິ່ງໜ້າ ໃນວັນທີ 07 ກຸມພາ 2022 ເປັນຕົ້ນໄປ ສໍາລັບນ້ອງນັກຮຽນ ມ.4 ທີ່ເລືອກຮຽນແບບເຊິ່ງໜ້າ ເພື່ອປະຕິບັດຕາມມາດຕະການປ້ອງກັນການແຜ່ລະບາດຂອງພະຍາດ Covid-19 ພາຍໃນໂຮງຮຽນ ມສ ວຽງຈັນ, ນັກຮຽນຄວນປະຕິບັດດັ່ງນີ້:

1. ຕ້ອງປະຕິບັດຕາມກົດລະບຽບຂອງໂຮງຮຽນທີ່ໄດ້ວາງອອກ.

2. ປະຕິບັດໂມງເວລາເຂົ້າຮຽນປົກກະຕິ ແຕ່ 7:30 ຫາ 16:00

3. ຕ້ອງຮັກສາໄລຍະຫ່າງທາງສັງຄົມ ຢ່າງໜ້ອຍ 1 ແມັດ ແລະ ລ້າງມືດ້ວຍນໍ້າສະອາດໃສ່ສະບູ ຫຼື ດ້ວຍເຈວລ້າງມືເປັນປະຈໍາ.

4. ຕ້ອງໃສ່ຜ້າອັດປາກອັດດັງຕະຫຼອດເວລາ ແລະ ມີເຈວລ້າງມືສ່ວນຕົວເພື່ອຮັກສາຄວາມສະອາດ.

5. ນັກຮຽນທີ່ມີອຸນນະພູມ 37,5 ອົງສາຂຶ້ນໄປ, ມີອາການໄຂ້, ຕາແດງ ຫຼື ບໍ່ສະບາຍຄວນໄປກວດຢູ່ໂຮງໝໍ ຫຼື ພັກຜ່ອນຢູ່ບ້ານກ່ອນ.

6. ເພື່ອຫຼີກເວັ້ນຄວາມແອອັດພາຍໃນຮ້ານຄ້າ, ນັກຮຽນຄວນເອົາຖ້ວຍ, ບ່ວງ, ຕຸກນໍ້າດື່ມ ແລະ ອາຫານທ່ຽງກຸ້ມຕົນເອງ. ແຕ່ກໍລະນີບໍ່ທັນທາງໂຮງຮຽນກໍ່ໄດ້ເປີດຮ້ານອາຫານບໍລິການຕາມປົກກະຕິ.

7. ຜູ້ປົກຄອງທີ່ຈະເຂົ້າມາພາຍໃນໂຮງຮຽນ ຫຼື ມາຮັບລູກຫຼານຂອງຕົນເອງແມ່ນຕ້ອງໃສ່ຜ້າອັດປາກອັດດັງ ແລະ ມາຮັບລູກຫຼານບໍ່ໃຫ້ກາຍ 16:30.

ດັ່ງນັ້ນ, ຈຶ່ງແຈ້ງມາຍັງ ຜູ້ປົກຄອງ, ນ້ອງນັກຮຽນທັງໝົດ ເພື່ອຮັບຊາບ ແລະ ພ້ອມກັນປະຕິບັດຕາມການແຈ້ງການນີ້ດ້ວຍ.

ຜູ້ອໍານວຍການໂຮງຮຽນ.

.

Related Posts

Leave a Reply

Your email address will not be published.