ກຽມສັກວັກຊີນໃຫ້ເດັກນ້ອຍ ອາຍຸ 6-11 ປີ ເລີ່ມຕົ້ນເດືອນມີນາ 2022

👏 👏 ກຽມສັກວັກຊີນໃຫ້ເດັກນ້ອຍ ອາຍຸ 6-11 ປີ ເລີ່ມຕົ້ນເດືອນມີນາ 2022 💪

ສປປ ລາວ ມີແຜນຈະສັກວັກຊີນປ້ອງກັນພະຍາດໂຄວິດ-19 ໃຫ້ເດັກນ້ອຍທີ່ມີອາຍຸລະຫວ່າງ 6-11 ປີ ໃນທົ່ວປະເທດ ເລີ່ມແຕ່ຕົ້ນ ເດືອນມີນາ ທີ່ຈະມາເຖີງນີ້ເປັນຕົ້ນໄປ ເພື່ອແນໃສ່ເຮັດໃຫ້ອັດຕາການສັກວັກຊີນພາຍໃນປະເທດ ບັນລຸຫລາຍກວ່າ 80% ຂອງພົນລະເມືອງພາຍໃນປີ 2022.

ດຣ ນາງ ຈັນໃສ ປະທໍາມະວົງ, ຮອງຫົວໜ້າໂຄງການສັກຢາແຫ່ງຊາດ ໃຫ້ສໍາພາດຕໍ່ສື່ມວນຊົນ ເມື່ອບໍ່ດົນມານີ້ ວ່າ: ການສັກວັກຊີນປ້ອງກັນພະຍາດໂຄວິດ-19 ໃຫ້ເດັກນ້ອຍໃນກຸ່ມອາຍຸລະຫວ່າງ 6-11 ປີ

ໃນຄັ້ງນີ້ ແມ່ນໄດ້ຖອດຖອນບົດຮຽນຈາກຕ່າງປະເທດທີ່ສັກວັກຊີນດັ່ງກ່າວໃຫ້ເດັກນ້ອຍມາແລ້ວ, ລວມເຖີງຖອດຖອນບົດຮຽນຈາກການທົດລອງສັກວັກຊີນໃຫ້ເດັກນ້ອຍຢູ່ແຂວງຜົ້ງສາລີ ທີ່ດໍາເນີນມາກ່ອນໜ້ານີ້ເຊັ່ນດຽວກັນ.

ສໍາລັບເດັກໃນກຸ່ມເປົ້າໝາຍທີ່ຈະສັກໃນຄັ້ງນີ້ ທົ່ວປະເທດ ມີ 957.042 ຄົນ. ສ່ວນວັກຊີນທີ່ຈະນໍາມາສັກ ແມ່ນມີພຽງພໍກັບຄວາມຕ້ອງການ ເພາະມາຮອດປັດຈຸບັນ ສປປ ລາວ ໄດ້ຮັບການຊ່ວຍເຫລືອວັກຊີນປ້ອງກັນພະຍາດໂຄວິດ-19 ຫລາຍຊະນິດຈາກຕ່າງປະ ເທດ ແລະ ອົງການຈັດຕັ້ງສາກົນ ທັງຮູບແບບຊ່ວຍເຫລືອໂດຍກົງ ແລະ ການຊ່ວຍເຫລືອຜ່ານໂຄງການໂຄແວັກ ຫລາຍກວ່າ 18 ລ້ານໂດສ.

ດຣ ນາງ ຈັນໃສ ປະທໍາມະວົງ ຍັງໄດ້ຮຽກຮ້ອງມາຍັງພໍ່ແມ່ ແລະ ຜູ້ປົກຄອງນໍາເອົາລູກຫລານທີ່ຢູ່ໃນເກນອາຍຸດັ່ງກ່າວ ໄປສັກວັກຊີນປ້ອງກັນພະຍາດໂຄວິດ-19 ຢູ່ຈຸດບໍລິການຕ່າງໆ ເມື່ອຄະນະສະເພາະກິດແຕ່ລະທ້ອງຖິ່ນທົ່ວປະເທດເປີດສັກຕົວຈິງພາຍໃນຕົ້ນ ເດືອນມີນາ ທີ່ຈະມາເຖີງນີ້ ເພື່ອສ້າງພູມຄຸ້ມກັນພະຍາດດັ່ງກ່າວໃຫ້ແກ່ເດັກນ້ອຍ, ທັງເປັນການປະກອບສ່ວນເຮັດໃຫ້ອັດຕາການສັກວັກຊີນຢູ່ລາວ ບັນລຸຫລາຍກວ່າ 80% ພາຍໃນປີ 2022 ຕາມທີ່ວາງຄາດໝາຍເອົາໄວ້ ແລະ ເຮັດໃຫ້ນັກຮຽນໄດ້ກັບມາຮຽນໜັງສືແບບເຊີ່ງໜ້າຢູ່ພາຍໃນໂຮງຮຽນໄດ້ເປັນປົກກະຕິໃນຕໍ່ໜ້າ.

Related Posts

Leave a Reply

Your email address will not be published.