ສະມາຄົມນໍ້າມັນເຊື້ອໄຟ ແລະ ອາຍແກັດລາວ ຈັດກອງປະຊຸມ ປະຈໍາປີ 2022.

ສະມາຄົມນໍ້າມັນເຊື້ອໄຟ ແລະ ອາຍແກັດລາວ ຈັດກອງປະຊຸມ ປະຈໍາປີ 2022.

ໃນຕອນບ່າຍວັນທີ 10 ພຶດສະພາ 2022 ທີ່ສະພາການຄ້າ ແລະ ອຸດສາຫະກໍາແຫ່ງຊາດລາວ ເພື່ອທົບທວນຄືນສະພາບການສະໜອງນໍ້າມັນເຊື້ອໄຟ ແລະ ອາຍແກັດໃນໄລຍະ 1 ປີ .

ຜ່ານມາ, ລວມເຖີງປຶກສາຫາລືກ່ຽວກັບການແກ້ໄຂບັນຫາລາຄາ ແລະ ການສະໜອງນໍ້າມັນເຊື້ອໄຟບໍ່ພຽງພໍກັບຄວາມຕ້ອງການຂອງສັງຄົມທີ່ພວມປະສົບຢູ່ໃນປັດຈຸບັນນີ້.

ພາຍຫລັງສໍາເລັດກອງປະຊຸມ ທ່ານ ຄຳແພງ ໄຊສົມແພງ, ລັດຖະມົນຕີກະຊວງອຸດສາຫະກຳ ແລະ ການຄ້າ ທີ່ໃຫ້ກຽດເຂົ້າຮ່ວມກອງປະຊຸມຄັ້ງນີ້ ໄດ້ຖະແຫລງຂ່າວຕໍ່ສື່ມວນຊົນ, ທ່ານໄດ້ຍົກໃຫ້ເຫັນສະພາບການຂອງໂລກທີ່ເຮັດໃຫ້ລາຄານໍ້າມັນເຊື້ອໄຟສໍາເລັດຮູບຢູ່ຕະຫຼາດສືບຕໍ່ເໜັງຕີງຂຶ້ນສູງ ແລະ ສົ່ງຜົນກະທົບໂດຍກົງເຮັດໃຫ້ລາຄາຂາຍ ຍ່ອຍນ້ຳມັນເຊື້ອໄຟ ໃນ ສປປ ລາວ ປັບຂຶ້ນເປັນເງົາຕາມໂຕ.

ລວມເຖີງບັນຫາ​ອັດ​ຕາ​ແລກ​ປ່ຽນ​ເງິນ​ຕາ​ຕ່າງ​ປະ​ເທດ​ ມີ​ສ່ວນ​ຜິດ​ດ່ຽງສູງລະ​ຫວ່າງ​ທະ​ນາ​ຄານ​ທຸ​ລະ​ກິດກັບຮ້ານ​ແລກ​ປ່ຽນ​ເງິນ, ນອກຈາກນີ້ ມີ​ບາງ​ບໍ​ລິ​ສັດ​​ທີ່ມີ​ການ​ເຄື່ອນ​ໄຫວ​ບໍ່​ຖືກ​ຕ້ອງ, ບາງປໍ້າລັກ​ລອບຊື້​ນ້ຳ​ມັນ​ຈາກ​ພາກ​ສ່ວນ​ອື່ນ​ມາ​ລົງ​ປ້ຳ​, ​ບໍລິສັດນຳເຂົ້ານ້ຳມັນເຊື້ອໄຟ ແລະ ບໍລິສັດຈຳຫນ່າຍພາຍໃນທີ່ມີລະບົບສາງຈຳນວນຫນຶ່ງສວຍ​ໂອ​ກາດກັກ​ຕຸນ​ນ້ຳ​ມັນ​ໃນໄລ​ຍະ​ທີ່​​ມີການ​ປັບ​ລາ​ຄາ​ນ້ຳ​ມັນເຊື້ອໄຟ ແລະ ບໍ່​ປະ​ຕິ​ບັດ​ຕາມ​ລາ​ຄາ​ທີ່​ລັດ​ອອກ​ແຈ້ງ​ການແຕ່ລະຄັ້ງ.

ຕໍ່ບັນຫາທີ່ເກີດຂຶ້ນ ເຮັດໃຫ້ບັນດາບໍລິສັດຜູ້ນໍາເຂົ້ານ້ຳມັນເຊື້ອໄຟຂອງລາວເຮົາ ປະສົບບັນຫາ ໂດຍບໍ່ສາ ມາດນໍາເຂົ້າໄດ້ຕາມປະລິມານຄວາມຕ້ອງການ ເນື່ອງຈາກມື້ນຳເຂົ້າ ຫຼື ມີການຊຳລະເງິນຄ່ານ້ຳມັນເຊື້້ອໄຟ ແຕ່ລາຄາໂຄງສ້າງພາຍໃນຍັງບໍ່ປັບຂື້ນທຽບກັບລາຄາໂລກ ເຮັດໃຫ້ບໍລິສັດຕ້ອງດຳເນີນທຸລະກິດໃນສະພາບຂາດທຶນ.

ອີກບັນຫາຫນຶ່ງ ແມ່ນຍ້ອນການຂາດແຄນເງິນຕາເນື່ອງຈາກການຈຳໜ່າຍນໍ້າມັນຢູ່ປ້ຳພາຍໃນເປັນເງິນກີບ, ແຕ່ການສຳລະຄ່ານໍ້າມັນ ຜູ້ສະຫນອງຢູ່ຕ່າງປະເທດເປັນເງິນຕາ ຈຶ່ງເປັນສາເຫດໃຫ້ການນຳເຂົ້ານໍ້າມັນປະເຊີນຫນ້າກັບຄວາມຫຍູ້ງຍາກ ແລະ ມີປະລິມານນຳເຂົ້າທີ່ຫຼຸດລົງ ຊຶ່ງນຳມາຈຳໜ່າຍໃຫ້ລູກຄ້າ ກໍມີປະລິມານຈໍາກັດລົງໄປນຳ ເປັນເຫດ ຜົນເຮັດໃຫ້ ບາງປໍ້ານໍ້າມັນເຊື້ອໄຟທີ່ບໍ່ໄດ້ຮັບການສະໜອງຈາກບໍລິສັດແມ່ໄດ້ພຽງພໍ ຈຶ່ງບໍ່ມີນໍ້າມັນເຊື້ອໄຟຂາຍ ຫຼື ໄດ້ຈຳໜ່າຍໝົດກ່ອນການສະໜອງ.

ທ່ານ ຄຳແພງ ໄຊສົມແພງ ກ່າວຕື່ມວ່າ: ເພື່ອແກ້ໄຂບັນຫານໍ້າມັນຂາດແຄນໃນປັດຈຸບັນ ລັດຖະບານ ໄດ້ວາງແຜນການແກ້ໄຂ ໂດຍແບ່ງອອກເປັນ 3 ໄລຍະ ຄື: ໄລຍະສັ້ນ ແມ່ນຈະຊຸກຍູ້ໃຫ້ທະນາຄານສະໜອງເງິນຕາ ໃຫ້ບັນດາບໍລິສັດທີ່ນໍາເຂົ້ານໍ້າມັນເຊື້ອໄຟຈໍານວນໜຶ່ງ (ເພາະບໍ່ສາມາດສະໜອງໃຫ້ໝົດທຸກບໍລິສັດທີ່ນໍາເຂົ້ານໍ້າມັນເຊື້ອໄຟ) ເຊີ່ງອາດນໍາເອົາເງິນທີ່ໄດ້ຈາກການຂາຍບໍ່ແຮ່ຕ່າງໆ ເພື່ອມາສະໜອງໃຫ້ບໍລິສັດທີ່ນໍາເຂົ້ານໍ້າມັນ ຖ້າບໍ່ໄດ້ໝົດກໍໃຫ້ໄດ້ປະມານ 50-60% ເພາະເດືອນໜຶ່ງຕ້ອງການປະມານ 100 ລ້ານກວ່າໂດລາສະຫະລັດ ແຕ່ຖ້າຫາກສາມາດສະໜອງໄດ້ ປະມານ 50-60 ລ້ານໂດລາສະຫະລັດ ຈະສາມາດແກ້ໄຂໄດ້ ແລະ ຈະເຮັດໃຫ້ມີນໍ້າມັນບໍ່ຂາດເຂີນຄືປັດຈຸບັນ.

ສ່ວນໄລຍະກາງ ຈະພະຍາຍາມເຈລະຈາເພື່ອຊື້ນໍ້າມັນຈາກແຫລ່ງອື່ນນອກເໜືອຈາກທີ່ຕົກລົງຊື້-ຂາຍກັບຕ່າງປະເທດໃນປັດຈຸບັນ.

ສ່ວນໄລຍະຍາວ ຈະຕ້ອງໄດ້ວາງນະໂຍບາຍ ແລະ ຍຸດທະສາດໃຫ້ຖືກຕ້ອງສອດຄ່ອງກັບການພັດທະນາເສດຖະກິດ-ສັງຄົມຂອງລາວໃນປັດຈຸບັນ ເພາະລາວເຮົາຍັງບໍ່ມີກອງທຶນນໍ້າມັນ ແລະ ຄັງແຮ ຕ້ອງອາໃສແຕ່ທະນາຄານແຫ່ງ ສປປ ລາວ, ທະນາຄານການຄ້າຕ່າງປະເທດ ແລະ ຮ້ານແລກປ່ຽນເງິນຕາ ຖ້າຫາກທະນາຄານເຫລົ່າບໍ່ສາມາດສະໜອງເງິນຕາຈະເຮັດໃຫ້ຫຍຸ້ງຍາກໃນການໄປຊື້ນໍ້າມັນເຂົ້າມາຈໍາໜ່າຍພາຍໃນປະເທດ.

ນອກຈາກນີ້ ຕ້ອງໄດ້ໂຄສະນາເຜີຍແຜ່ໃຫ້ສັງຄົມຮັບຮູ້ ແລະ ເຂົ້າໃຈຢ່າງກ້ວາງຂວາງກວ່າເກົ່າກ່ຽວກັບການນໍາເຂົ້າ ແລະ ການຈໍາໜ່າຍນໍ້າມັນເຊື້ອໄຟໃນສັງຄົມລາວທີ່ຕ້ອງອາໃສການນໍາເຂົ້າຈາກຕ່າງປະເທດທັງໝົດ.

ລັດຖະມົນຕີກະຊວງອຸດສາຫະກຳ ແລະ ການຄ້າ ຍັງໄດ້ເວົ້າເຖີງຂ່າວທີ່ວ່າ ສປປ ລາວ ຈະຊື້ນໍ້າມັນເຊື້ອໄຟຈາກລັດເຊຍ ວ່າ: ນັ້ນເປັນພຽງຄໍາຄິດເຫັນຂອງບາງທ່ານທີ່ຍົກຂຶ້ນໃນກອງປະຊຸມ ແຕ່ບໍ່ແມ່ນການຕົກລົງຂອງລັດ ຖະບານ ຫລື ການຕົກລົງຂອງກະຊວງກ່ຽວຂ້ອງແຕ່ຢ່າງໃດ ເພາະມີບາງທ່ານສະເໜີຂຶ້ນວ່າ ໃນຕໍ່ໜ້າຖ້າມີເງື່ອນໄຂໃຫ້ຊື້ນໍ້າມັນຈາກຣັດເຊຍ ແຕ່ໃນຕົວຈິງແລ້ວຖ້າຈະໄປຊື້ນໍ້າມັນຈາກຣັດເຊຍ ຫລື ປະເທດອື່ນທີ່ ສປປ ລາວ ບໍ່ເຄີຍຊື້-ຂາຍນໍາ ຕ້ອງໄດ້ຜ່ານຫລາຍຂັ້ນຕອນ ທັງການເຈລະຈາໃນດ້ານລາຄາ, ຄຸນນະພາບຂອງນໍ້າມັນ, ການຂົນສົ່ງ ແລະ ອື່ນໆ ເຊີ່ງຈະມີຄວາມຫຍຸ້ງຍາກຫລາຍຢ່າງ.

FM 90 ລາຍງານ

Related Posts

Leave a Reply

Your email address will not be published.