ພິທີນິມົນພະພຸດທະຮູບ ພະພຸດທະປາຣະມີ

ວັນທີ 20 ມັງກອນ 2021 ນີ້ ຄະນະອົງການພຸດທະສາສະໜາສຳພັນລາວແຂວງບໍ່ແກ້ວ ກຳມາທິການສາທາລະນູປະການ ໂດຍການນຳພາຂອງ ພຣະຫຼັກຄຳ ຣັດຕະນີໂຊຕິກາຈານ ອາດຍາທັມຄຳເງີນ ຄຳວົງ ເຈົ້າຄະນະແຂວງບໍ່ແກ້ວ, ພຣະອາຈານໃຫຍ່ ຄູບາຄຳແສນ ຊະວະນະປັນໂຍ ປະທານທີປືກສາ ອພສ ແຂວງ.

ພຣະອາຈານ ຈຸ່ມ ວັດຊະຣະ ເຈົ້າອະທິການວັດສີບຸນເຮືອງ ຮອງເຈົ້າຄະນະແຂວງ ຫົວໜ້າກຳມາທິການສາທາລະນູປະການ ພ້ອມດ້ວຍພຣະເຖຣານຸເຖຣະ ແລະ ສັດທາອອກຕົນຍາດໂຍມບ້ານສີບຸນເຮືອງ ໄດ້ອາຣາດທະນານິມົນພຣະພຸດທະຮູບພຣະພຸດທະປາຣະມີ ທີ່ປະດິດສະຖານຢູ່ວິຫານວັດບຸນເຮືອງ ເພື່ອນໍາໄປຖວາຍ ແລະ ປະດິດສະຖານຢູ່ວັດປ່າຜາໂອ ນະຄອນຫຼວງພະບາງ.

ເນື່ອງໃນໂອກາດທີ່ຄະນະບໍລິຫານວັດປ່າຜາໂອ ນໍາໂດຍສາທຸໃຫຍ່ ອ່ອນແກ້ວ ກິດຕິພັດໂທ ເຈົ້າຄະນະແຂວງ ຫຼວງພະບາງ ຈະໄດ້ຈັດພິທີສະເຫຼີມສະຫຼອງກຸດຕິມະຫາເຖຣະອາຄັນຕຸກະ ຫຼື ກຸດຕິຮັບແຂກພຣະມະຫາເຖຣະ ທີ່ຈະຈັດຂຶ້ນເລີ່ມແຕ່ວັນທີ 25 ມັງກອນ 2021 ທີ່ຈະມາເຖິງນີ້.

ເຊິ່ງຂະບວນອາຣາດທະນານິມົນ ໄດ້ເລີ່ມເຄື່ອນອອກຈາກວັດສີບຸນເຮືອງ ໃນຕອນເຊົ້າ ເວລາ 5 : 30 ນາທີ ໄປສູ່ທ່າເຮືອເມືອງຫ້ວຍຊາຍ ຈາກນັ້ນກໍ່ໄດ້ອັນເຊີນພຣະພຸດທະປາຣະມີຂຶ້ນສູ່ເຮືອ ແລະ ເລີ່ມລ່ອງເຮືອຈາກເມືອງຫ້ວຍຊາຍໄປຕາມລໍາແມ່ນໍ້າຂອງມຸ່ງໜ້າໄປສູ່ນະຄອນຫຼວງພະບາງ ຕະຫຼອດໄລຍະການລ່ອງເຮືອໄດ້ມີການສູດທະຍາຍມະຫາສະມັຍຍະສູດ ແລະ ທຳມະຈັກກັປປະວັຕຕະນະສູດ, ຂະບວນເຮືອໄດ້ເຖິງຄອນຫຼວງພະບາງ ທີ່ທ່າຫຼວງ ເວລາ ປະມານ 6 : 28 ນາທີ.

ໂອກາດໄປເຖິງກໍ່ໄດ້ຮັບການຕ້ອນຈາກຄະນະບໍລິຫານວັດປ່າຜາໂອ ແລະ ພາກສ່ວນຂະແໜງການທີ່ກ່ຽວຂ້ອງຂອງ ນະຄອນ ຫຼວງພະບາງ ຈາກນັ້ນ ກໍ່ໄດ້ອັນເຊີນພຣະພຸດທະປາຣະມີໄປສູ່ວັດແສນ ສຸກຂາຣາມ. ຕອນເຊົ້າ ວັນທີ 21 ມັງກອນ ຄະນະ ອພສ ແຂວງ ບໍ່ແກ້ວ, ຄະນະບໍລິຫານວັດປ່າຜາໂອ, ຂະແໜງການທີ່ກ່ຽວຂ້ອງ ແລະ ພຸດທະສາສະນິກະຊົນຊາວນະຄອນຫຼວງພະບາງ ໄດ້ເຕົ້າໂຮມຢູ່ຕໍ່ໜ້າວັດແສນ ສຸກຂາຣາມ ແລະ ໄດ້ເລີ່ມເຄື່ອນຂະບວນອັງເຊີນພຣະພຸດທະປາຣະມີອອກຈາກວັດແສນ ເວລາ 9 : 00 ນາທີ, ຂະບວນໄດ້ເຖິງວັດປ່າຜາໂອ ເລລາ 10 : 30 ນາທີ.

ຈາກນັ້ນ ກໍ່ໄດ້ເຕົ້າໂຮມພະສົງສາມະເນນພາຍໃນວັດ ແລະ ພຸດທະສາສະນິກະຊົນພາຍໃນນະຄອນຫຼວງພະບາງທີ່ເຂົ້າຮ່ວມ, ໄຫວ້ພຣະ, ຮັບສິນ ແລະ ຖວາຍພຣະພຸດທະປາຣະມີ ພ້ອມດ້ວຍປັດໄຈໄທຍະຕ່າງໆ ແດ່ຄະນະສົງວັດປ່າຜາໂອ. ໂອກາດນີ້ ສາທູໃຫຍ່ ອ່ອນແກ້ວ ກິດຕິພັດໂທ ເຈົ້າຄະນະແຂວງ ຫຼວງພຣະບາງ ເຈົ້າອະທິການວັດປ່າຜາໂອ ກໍ່ໄດ້ກ່າວຄໍາຂອບອົກຂອບໃຈມາຍັງຄະນະ ອພສ ແຂວງ ບໍ່ແກ້ວ ແລະ ຄະນະສັດທາບ້ານສີບຸນເຮືອງ

ທີ່ມີສັດທາອັນແຮງກ້າໄດ້ອັນເຊີນພຣະພຸດທະປາຣະມີຈາກວັດສີບຸນເຮືອງ ແຂວງ ບໍ່ແກ້ວ ມາຖວາຍເພື່ອປະດິດສະຖານຢູ່ວັດປ່າຜາໂອ ເພື່ອໃຫ້ພຸດທະສາສະນິກະຊົນຊາວນະຄອນຫຼວງພະບາງໄດ້ຂາບໄຫວ້ສັກກາຣະບູຊາ. ພຣະພຸດທະປາຣະມີເປັນໜື່ງໃນພຣະພຸດທະຮູບຫຼາຍໆອົງທີ່ພຣະອາຈານຈຸ່ມ ວັດຊະຣະ ພ້ອມດ້ວຍສັດທາອອກຕົນຍາດໂຍມ ໄດ້ສ້າງເພື່ອຖວາຍຫຼາຍໆວັດໃນຂອບເຂດທົ່ວປະເທດ.

ມີທັງພຸດທະຮູບປູນປັ້ນ ແລະ ພຣະພຸດທະທະຮູບທີ່ຫຼໍ່ດ້ວຍໂລຫະ ພິເສດພຣະພຸດທະປາຣະມີທີ່ອາໜາດທະນານິມົນມາຖວາຍວັດປ່າຜາໂອຄັ້ງນີ້ ແມ່ນພຣະພຸດທະຮູບທອງເຫຼືອງ.

ເຊິ່ງພຣະພຸດຮູບສ່ວນໃຫຍ່ທີ່ໄດ້ສ້າງພາຍໃຕ້ການຊີ້ນໍາຂອງພຣະອາຈານຈຸ່ມແມ່ນມີຮູບແບບຖືກຕ້ອງຕາມພຸດທະສິນສະກຸນຊ່າງລາວລ້ານຊ້າງ.

ພາບ: ວັດສີບຸນເຮືອງ.

ຂ່າວ: ອຸໄທ ພູມມາ.

Related Posts

Leave a Reply

Your email address will not be published. Required fields are marked *