ທ່ານຮອງເຈົ້າແຂວງບໍ່ແກ້ວ ລົງເຮັດວຽກຢູ່ ເມືອງ ຜາອຸດົມ

ຊື້ເລກທີ່ນີ້ ມີແຕ່ໄດ້ກັບໄດ້ 100%

ໃນວັນທີ 12 ມີນາ 2021 ນີ້. ທ່ານ ເຄື່ອນເພັດ ວົງຈັນ ຄະນະປະຈໍາພັກແຂວງ ຮອງເຈົ້າແຂວງໆບໍ່ແກ້ວ ຜູ້ຊີ້ນໍາຂົງເຂດເສດຖະ ກິດ ພ້ອມດ້ວຍຄະນະ ໄດ້ລົງຕິດຕາມຊຸກຍູ້ວຽກງານຟື້ນຟູຊີວິດການເປັນຢູ່ຂອງປະຊາຊົນທີຖືກຜົນກະທົບ ຈາກໂຄງການກໍ່ສ້າງເຂື່ອນໄຟຟ້ານໍ້າທາ1 ເຂດຈັດສັນຫາດໝວກ ເມືອງ ຜາອຸດົມ ແຂວງ ບໍ່ແກ້ວ. ໂດຍການຕ້ອນຮັບຂອງທ່ານ ຈັນທອນ ພົນທະລາ ກຳມະ ການພັກແຂວງ ເລຂາພັກເມືອງ ເຈົ້າເມືອງໆ ຜາອຸດົມ ພ້ອມຄະນະນໍາຂອງເມືອງ ຕະຫຼອດຮອດພໍ່ແມ່ປະຊາຊົນບັນດາເຜົ່າ.

ຄະນະຮັບຜິດຊອບໄດ້ລາຍງານຄວາມຄືບໜ້າຂອງໂຄງການກໍ່ສ້າງເຂື່ອນໄຟຟ້ານໍ້າຫາດໝວກ ຕັ້ງຢູ່ບ້ານຫາດໝວກ ເມືອງ ຜາອຸດົມ ແຂວງ ບໍ່ແກ້ວ. ພັດທະນາໂດຍບໍລິສັດ ນໍ້າທາຫາດໝວກ ໄມໂຄຣໄຮໂດຣ ພາວເວີ ຈໍາກັດ ເປັນການລົງທືນຂອງເອກະຊົນຕ່າງປະເທດ 100% ລວມມູນຄ່າການລົງທຶນທັງໝົດ 65.253.000 ໂດລາສະຫະລັດ.

ຫ່າງຈາກເຂື່ອນໄຟຟ້ານໍ້າທາ 1 ປະມານ 22 ກມ, ມີເນື້ອທີ ອ່າງໂຕ່ງ 8.078 ກິໂລຕາແມັດ ເທົ່າກັບ 89,86% ຂອງເນື້ອທີອ່າງໂຕ່ງທັງໝົດຂອງເຂື່ອນໄຟຟ້ານໍ້າທາ1. ໂຄງການນີ້ ເປັນໂຄງການເພື່ອຕອບສະໜອງກະແສໄຟຟ້າຮັບໃຊ້ວຽກງານ ເສດຖະ ກິດ-ສັງຄົມ ພາຍໃນປະເທດ. ຄວາມຄືບໜ້າການຈັດຕັ້ງປະຕິບັດ ແຜນຟື້ນຟູ-ປັບປຸງຊີວິດການເປັນຢູ່ ແລະ ພັດທະນາສັງຄົມ ແບບຢືນຍົງຂອງປະຊາຊົນເຂດຍົກຍ້າຍຈັດສັນຫາດໝວກ.

ເຊິ່ງມາຮອດປັດຈຸບັນ ສໍາເລັດການລົງສໍາຫຼວດ, ວັດແທກ ແລະ ອອກໃບສໍາມະໂນນໍາໃຊ້ທີດິນ ທໍາການຜະລິດໃຫ້ແກ່ປະຊາຊົນ 566 ຄອບຄົວ ຕາມແຜນຂອງໂຄງການ 1.5 ເຮັກຕາ/ຄອບຄົວ ມີທັງໝົດ 849 ເຮັກຕາ. ສຳເລັດການສ້າງແຜນທີນໍາໃຊ້ຢ່າງຖາວອນຂອງດິນທໍາການຜະລິດ ແລະ ກໍານົດຂອບເຂດການສົ່ງເສີ່ມຂອງໂຄງການ.

ວຽກງານການສ້າງສວນສາທິດ: ໄດ້ສາທິດການປູກ-ການລ້ຽງ ໃນນີ້, ມີພືດສວນຄົວລະດູແລ້ງ ແລະ ໄມ້ໃຫ້ໝາກແບບຕໍ່ເນື່ອງ, ສາ ທິດການລ້ຽງພໍ່ແມ່ພັນ ໄກ່ລາດ, ເປັດເທດ, ງົວ ແລະ ສັດນໍ້າ. ວຽກງານການຜະລິດເພື່ອບໍລິໂພກ: ໃນນີ້ ໄດ້ສົ່ງເສີມການປູກພືດສວນຄົວແລ້ວ ຈໍານວນ 360 ຄອບຄົວ, ກຸ່ມປູກເຫັດ 14 ຄອບຄົວ ແລະ ປູກພືດເສດຖະກິດ 329 ຄອບຄົວ. ວຽກງານສົ່ງເສີ່ມກຸ່ມການລ້ຽງສັດນ້ອຍເພື່ອເປັນອາຫານ: ໃນນີ້, ໄດ້ສົ່ງເສີ່ມການລ້ຽງໝູ ຈໍານວນ 162 ຄອບຄົວ, ລ້ຽງໄກ່ 100 ຄອບ ຄົວ, ລ້ຽງເປັດ 76 ຄອບຄົວ, ລ້ຽງປາດຸກ 67 ຄອບຄົວ ແລະ ລ້ຽງກົບ 60 ຄອບຄົວ.

ນອກນີ້, ຍັງໄດ້ຈັດເຝິກອົບຮົມ ແລະ ທັດສະນະສຶກສາ ແລະ ຈັດ ຕັ້ງປະຕິບັດກຸ່ມຜະລິດເພື່ອເປັນສິນຄ້າ ແລະ ສະໜອງເຄື່ອງມືຮັບໃຊ້ການຜະລິດ ແລະ ອຸປະກອນອື່ນໆສົ່ງເສີມກຸ່ມສະຕະວະແພດ.
ທ່ານ ເຄື່ອນເພັດ ວົງຈັນ ຄະນະປະຈຳພັກແຂວງ ຮອງເຈົ້າແຂວງ ໄດ້ເນັ້ນໜັກ ບັນດາຂະແໜງການກ່ຽວຂ້ອງຈົ່ງເອົາໃຈໃສ່ລົງຊຸກຍູ້ຕິດຕາມ ແລະ ແກ້ໄຂຊີວິດການເປັນຢູ່ຂອງປະຊາຊົນໃນແຕ່ລະໄລຍະໃຫ້ດີຂື້ນເປັນກ້າວໆ.

ໂດຍມີການເຝິກອົບຮົມໃຫ້ປະຊາຊົນໄດ້ຮັບຮູ້ ແລະ ເຂົ້າໃຈ ເພື່ອເປັນແນວທາງໃນການສືບຕໍ່ສ້າງເສດຖະກິດຄອບຄົວຂອງຕົນ ຈັດສັນອາຊີບໃຫ້ແກ່ປະຊາຊົນໃຫ້ສ່ອງຄອດກັບການດຳລົງຊີວິດ ແລະ ທັນກັບແຜນຍຸດທະສາດຂອງແຂວງ ໃນການແກ້ໄຂຄວາມທຸກຍາກຂອງປະຊາຊົນ ບົນພື້ນຖານແມ່ນມີຄວາມເຫັນດີ ໃນການຊຸກຍູ້ສົ່ງເສີ່ມບັນດາໜ້າວຽກຂອງໂຄງການໃນຕອນທ້າຍ

ທ່ານ ໄດ້ມອບເງິນ ຊ່ວຍເຫຼືອຈໍານວນ 7.500.000 ກີບ ເຂົ້າໃນວຽກງານຟື້ນຟູຊີວິດການເປັນຢູ່ຂອງປະຊາຊົນທີຖືກຜົນກະທົບ ຈາກໂຄງການກໍ່ສ້າງເຂື່ອນໄຟຟ້ານໍ້າທາ1 ເຂດຈັດສັນຫາດໝວກ ເມືອງ ຜາອຸດົມ ແຂວງ ບໍ່ແກ້ວ.

ພາບ-ຂ່າວ: ຄໍາຜົງ ຟອງສະຫວ່າງ

Related Posts

Leave a Reply

Your email address will not be published.