ບຸນພະທາດສີໂຄດຕະບອງປີນີ້ຈະຈັດຂຶ້ນໃນລະຫວ່າງວັນທີ 26-28 ມັງກອນ

ທ່ານ ແກ້ວລັນດອນ ຈັນທະປານີ ເຈົ້າເມືອງໆທ່າແຂກ ແຂວງຄໍາມ່ວນ, ທັງເປັນຮອງປະທານຈັດງານບຸນນະມັດສະການພະທາດສີໂຄດຕະບອງ​ ປະຈຳປີ 2021 ໃຫ້ຮູ້ວ່າ: ບຸນພະທາດປີນີ້ ຈະຈັດຕາມຮີດຄອງປະເພນີ ເນື່ອງຈາກວ່າປະຈຸບັນສະພາບບ້ານເມືອງຍັງຢູ່ໃນໄລຍະເຝົ້າລະວັງຕໍ່ການແຜ່ລະບາດຂອງພະຍາດໂຄວິດ.

ດ້ານການກະກຽມຄວາມພ້ອມໂດຍສະເພາະພື້ນຖານໂຄງລ່າງແມ່ນໄດ້ປະຕິສັງຂອນບໍລິເວນວັດ, ທາສີທາດ, ຕົບແຕ່ງປະດັບເອ້ຍ້ອງດ້ວຍດອກໄຟປະດັບ, ຕິດຕັ້ງເສົາໄຟສະປອດໄລ້ໃຫ້ມີຄວາມສະຫວ່າງ ແລະ ໄດ້ສ້າງຂະ ບວນການ 3 ອົງການຈັດຕັ້ງທົ່ວເມືອງອານາໄມອ້ອມຮອບເດີ່ນເພື່ອໃຫ້ມີຄວາມສວຍງາມ.

ສ່ວນກິດຈະກຳລະອຽດຂອງການຈັດງານ ແມ່ນລະ ຫວ່າງວັນທີ 26 – 28 ມັງກອນ, ເຊິ່ງໃນວັນທີ 26 ກົງກັບມື້ຂຶ້ນ 13 ຄໍ່າ ຈະໄດ້ກະກຽມຕົບແຕ່ງກອງບຸນຕາມປະເພນີສາສະໜາ

ວັນທີ 27 ຂຶ້ນ 14 ຄໍ່າ ເລີ່ມແຕ່ເວລາ 13 ໂມງແມ່ນກະກຽມແຫ່ຜາສາດເຜີ້ງຈາກຫ້ອງວ່າການເມືອງທ່າແຂກລົງຫາພະທາດເມືອງເກົ່າ ແລະ ໃນວັນທີ 28 ຂຶ້ນ 15 ຄໍ່າແມ່ນຈະໄດ້ຕັກບາດຖວາຍສັງຄະທານຢູ່ຫໍພະທາດສີໂຄດ. ນອກຈາກວຽກງານທາງພຸດທະສາສະໜາແລ້ວ ພາຍໃນງານຍັງໄດ້ມີກິດຈະກຳແຂ່ງຂັນກິລາເສັງກອງແຕ້ ແລະ ກິລາອື່ນໆຈຳນວນໜຶ່ງ ແລະ ຍາມຄໍ່າຄືນຂອງວັນທີ 27 ກໍ່ມີຂັບລໍາມະຫາໄຊ.

ດັ່ງນັ້ນ,​ ຈຶ່ງຂໍເຊີນຊວນບັນດາພໍ່ແມ່ພີນ້ອງ ປະຊາຊົນລາວບັນດາເຜົ່າຮ່ວມເປັນເຈົ້າພາບ, ເຈົ້າສັດທາ ແລະ ຂໍຮຽກຮ້ອງມາຍັງພໍ່ແມ່ປະຊາຊົນລວມເຖິງຜູ້ທີ່ຈະເຂົ້າມາຮ່ວມໃນງານບຸນໃຫ້ເປັນເຈົ້າການໃນການປ້ອງກັນໂຕເອງ ປະຕິບັດມາດຕະການປ້ອງກັນພະຍາດໂຄວິດ, ໃສ່ຜ້າປິດປາກ ແລະ ເປັນເຈົ້າການປົກປັກຮັກສາຄວາມສະຫງົບຄວາມເປັນລະຽບຮຽບຮ້ອຍ ເພື່ອຮັບປະກັນການດຳເນີນງານບຸນປະເພນີຄັ້ງນີ້ໃຫ້ມີຜົນສຳເລັດຢ່າງຈົບງາມ.

ຢ່າລືມກົດ ໄລ ເພື່ອເປັນກໍາລັງໃຈດ້ວຍ

Related Posts

Leave a Reply

Your email address will not be published. Required fields are marked *