​ອັດຕະປື ເຂັ້ມງວດມາດຕະການເພື່ອປ້ອງກັນ ແລະ ຄວບຄຸມພະຍາ ດໂ ຄ ວິ ດ-19

ເນື່ອງຈາກວ່າປະຈຸບັນສະພາບການລະບາດຂອງພະຍາດ ໂຄວິດ 19 ຢູ່ບັນດາປະເທດໃກ້ຄຽງ ແລະ ແຂວງໃກ້ຄຽງທີ່ພົບວ່າມີຜູ້ຕິດເຊື້ອພະຍາດດັ່ງກ່າວ,ດັ່ງນັ້ນຄະນະສະເພາະກິດ ເພື່ອປ້ອງກັນ ແລະ ຄວບຄຸມພະຍາດ ໂຄວິດ 19 ແຂວງອັດຕະປື ໄດ້ວາງມາດຕະການເຂັ້ມງວດຂື້ນຕື່ມ ເພື່ອບໍ່ໃຫ້ພະຍາດ ໂຄວິດ 19 ມີການແຜ່ລະບາດ ເຂົ້າມາແຂວງອັດຕະປື .ໂດຍທີ່ຫຼ້າສຸດໃນວັນທີ 22 ມັງກອນ 2021 ນີ້ຄະນະປ້ອງກັນ ແລະ ຄວບຄຸມພະຍາດ ໂຄວິດ 19 ແຂວງອັດຕະປື ໄດ້ຈັດກອງປະຊຸມເພື່ອຄົ້ນຄວ້າປຶກສາຫາລື ແລະ ວາງແຜນການປ້ອງກັນການລະບາດຂອງພະຍາດໂຄວິດ 19 ຂື້ນທີ່ຫ້ອງວ່າການປົກຄອງແຂວງ.

ພາຍໃຕ້ການເປັນປະທານຂອງທ່ານ ເລັດ ໄຊຍະພອນ ເຈົ້າແຂວງອັດຕະປື,ມີຄະນະສະເພາະກິດ ເພື່ອປ້ອງກັນ ແລະ ຄວບຄຸມພະຍາດໂຄວິດ 19 ຂັ້ນແຂວງ,ເມືອງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ກອງປະຊຸມໄດ້ຮັບຟັງການລາຍງານສະພາບການກະກຽມຄວາມພ້ອມ ໃນການຈັດງານພິທີສົມໂພດພະເຈົ້າໄຊຍະເຊດຖາທິຣາດ ແລະ ວິທີທາງມາດຕະການປ້ອງກັນການແຜ່ລະບາດຂອງພະຍາດ ໂຄວິດ 19 ພາຍໃນແຂວງອັດຕະປື ຈາກຄະນະກອງເລຂາ ,ພ້ອມດຽວກັນບັນດາຜູ້ເຂົ້າຮ່ວມຍັງໄດ້ປະກອບຄໍາເຫັນ ເພື່ອຊອກໃຫ້ເຫັນວິທີທາງໃນການປ້ອງກັນພະຍາດດັ່ງກ່າວ,ເຊິ່ງກອງປະຊຸມໄດ້ເຫັນດີເປັນເອກະພາບຄື:

ຕໍ່ກັບວຽກງານສົມໂພດເຈົ້າໄຊຍະເຊດຖາທິຣາດ ແມ່ນເຫັນດີໃຫ້ຈັດໄປຕາມຮີດຄອງປະເພນີ ຕາມຄວາມເໝາະສົມ ແລະ ຮັດກຸມທີ່ສຸດ,ໂດຍກໍານົດເອົາລາຍການໝໍລໍາໃຕ້ 1 ຄະນະ ມີ 8 ຄົນ ແລະ ຄະນະສະແດງສິນລະປະຂອງແຂວງສ່ວນໃດສ່ວນໜຶ່ງ,ສໍາລັບວຽກງານສະແດງສີນຄ້າ ແມ່ນໃຫ້ພາກສ່ວນທີ່ກ່ຽວຂ້ອງລະດົມໃຫ້ຍົກເລີກ ແລະ ຖອດຖອນ.

ຍົກເວັ້ນສີນຄ້າວາງສະແດງຂອງ 5 ຕົວເມືອງທີ່ໄດ້ມີການວາງສະແດງກ່ອນໜ້ານີ້ແລ້ວ ແຕ່ໃຫ້ປະຕິບັດຕາມາດຕະການປ້ອງກັນຢ່າງເຂັ້ມງວດ,ພິທີໃສ່ບາດ,ນັ່ງສະມາທິ ແມ່ນຍັງເຫັນດີໃຫ້ຈັດໄດ້ແຕ່ຕ້ອງປະຕິບັດຕາມຫຼັກການແພດ ໂດຍໃຫ້ມີການຮັກສາໄລຍະຫ່າງ,​ ໃສ່ຜ່າອັດປາກ,​ ລ້າງມືດ້ວຍເຈວ ຫຼື ສສະບູ.

ພ້ອມນັ້ນຕ້ອງໄດ້ຕັ້ງຈຸດກັ້ນກອງຢູ່ 3 ຈຸດໃຫຍ່ຄື: ຈຸດປ້ອມຫຼັກ 7 ກ່ອນເຂົ້າເທດສະບານແຂວງ,ຈຸດປ້ອງສະເພົາທອງ ແລະ ຈຸດກັ້ນກອງຫຼັກ 16 ເມືອງໄຊເສດຖາ, ເພື່ອປ້ອງກັນພະຍາດໂຄວິດ 19 ແລະ ຄວາມປອດໄພອື່ນໆ.ກອງປະຊຸມຍັງໄດ້ເຫັນດີມອບໃຫ້ກໍາລັງ ປກສ ແຂວງ,ເມືອງ ພະແນກສາທາລະນະສຸກ ແຂວງ, 5 ຕົວເມືອງ,ລົງກວດຈຸດຫຼໍ່ແຫຼມທີ່ມີແຮງງານລັກລອບເຂົ້າ-ອອກເມືອງທີ່ຜິດກົດໝາຍ,ໃຫ້ບັນດາເມືອງແຈ້ງການເຖິງບັນດາບ້ານ ເພື່ອໃຫ້ມີສະຕິ ແລະ ໃຫ້ຄວາມຮ່ວມມື ຕໍ່ເຈົ້າໜ້າທີ່ໃນການປ້ອງກັນການແຜ່ລະບາດຂອງພະຍາດດັ່ງກ່າວ,.

ພ້ອມນັ້ນຍັງໃຫ້ຄະນະສະເພາະກິດກໍານົດຈຸດກັກກັນຄືນໃໝ່ ແລະ ວາງມາດຕະການຄືນໄໝຕໍ່ແຮງງນ, ນັກສຶກສາ ແລະ ນັກທຸລະກິດທີ່ເດີນທາງເຂົ້າ-ອອກແຂວງອັດຕະປື,​ ບັນຮ້ານບັນເທິງ ແລະ ຮ້ານຄາລາໂອເກະ ແມ່ນໃຫ້ປະຕິບັດການ ເປີດ-ປິດ ຕຕາມລະບຽບການຢ່າງເຂັ້ມງວດ.

ກອງປະຊຸມຍັງໄດ້ວາງແຜນກະກຽມໃນກໍລະນີຫາກຢູ່ແຂວງໃກ້ຄຽງມີການລະບາດພະຍາດໂຄວິດ 19 ເພີ່ມຂື້ນຈາກ 1 ເປັນ 2 ຈາກ 2 ຫຼື 3 ແມ່ນເຫັນດີໃຫ້ຄະນະສະເພາະກິດຂັ້ນແຂວງອອກແຈ້ງການລອກດາວ ແຂວງອັດຕະປື ອັດຕະໂນມັດ ໂດຍປະຕິບັດຕາມມາດຕະການແບບຄັ້ງທໍາອິດ.​ ທັງນີ້ກໍ່ເພື່ອຢັບຢັ້ງບໍ່ໃຫ້ເຊື້ອພະຍາດ ໂຄວິດ 19 ແຜ່ລະບາດເຂົ້າມາສູ້ແຂວງອັດຕະປືໄດ້.

ຂ່າວ: ວັດທະນາ,​ ແຂວງອັດຕະປື

Related Posts

Leave a Reply

Your email address will not be published.