ແຊຣໄດ້ບຸນ.! ວິທີປັດເປົ່າສິ່ງບໍ່ດີໃຫ້ໝົດໄປນຳປີເກົ່າ​ ແລະ​ ຮັບໂຊກສິ່ງດີໆໃນປີໃໝ່ລາວດ້ວຍກະທົງໜ້າງົວ

ນີ້ແມ່ນບົດຄວາມດີໆຕາມຄວາມເຊື່ອໃນຮີດສິບສອງຄອງສິບສີ່ປະເພນີລາວບູຮານທີ່ແອດມິນວາລະສານເທວາໄດ້ຄົ້ນຄວ້າ​ ແລະ​ ຮັບຟັງຕາມການບອກສອນຂອງຄູບາອາຈານນັກປາດໃນສະໄໝກ່ອນ ແລະ​ ຈະຂໍນຳມາບອກເລົ່າຕໍ່ເພື່ອເປັນທັມມະທານໃຫ້ເພື່ອນໄດ້ຊາບນຳກັນ; ເພື່ອນໆບໍ່ຕ້ອງເສຍເວລາໄປເຮັດພິທີສະເດາະເຄາະ ຫລື​ ສືບຊະຕາໃຫ້ຫຍຸ້ງຍາກຫລືສິ້ນເປືອງຊັບສິນຈຳນວນຫລາຍໂດຍໄຮ້ປະໂຫຍດອີກແລ້ວ​; ເພາະວ່າປະເພນີທີ່ແອດມິນຈະເລົ່າກ່າວໃຫ້ຊາບຕໍ່ໄປນີ້ຄື​ວິທີ​ທີ່ເພື່ອນໆສາມາດສະເດາະເຄາະປັດເປົ່າສິ່ງບໍ່ດີໃຫ້ໝົດໄປໄດ້ດ້ວຍຕົນເອງດັ່ງນີ້ :

ໃນຕອນແລງກ່ອນມື້ສັງຂານລ່ວງປີໃໝ່ລາວໜຶ່ງມື້ຕາມປະເພນີເກົ່າແກ່ທີ່ສືບທອດມາແຕ່ບູຮານຄົນລາວບາງທ້ອງຖິ່ນຈະສ້າງກະທົງໜ້າງົວຂຶ້ນມາ​ໂດຍເຫດຜົນທີ່ກະທົງນີ້ມີຊື່ວ່າ :

“ໜ້າງົວ” ກໍ່ເພາະວ່າມີລັກສະນະສາມຫລ່ຽມສາມແຈຄ້າຍຄືຮູບຊົງຂອງໜ້າງົວນັ້ນເອງ​ ຄົນບູຮານເອີ້ນຊື່ກະທົງແນວນີ້ເພື່ອໃຫ້ຄົນເຂົ້າໃຈງ່າຍ; ວັດສະດຸທີ່ໃຊ້ເຮັດກະທົງໜ້າງົວແມ່ນຈະເຮັດດ້ວຍກາບກ້ວຍ​ ໂດຍໃນນີ້ຄວາມຍາວຂອງກະທົງແມ່ນຈະແທກເອົາຕາມຄືບຂອງພໍ່ເຮືອນ​ ຫລື ແມ່ເຮືອນ​ ຫລື​ ຜູ້ທີ່ເປັນໃຫຍ່ໃນເຮືອນໂດຍຈະໃຫ້ເພິ່ນຄືບສາມຄືບແລ້ວຕັດກາບກ້ວຍແລະທົບກາບກ້ວຍຕາມແຕ່ລະຄືບນັ້ນແລ້ວຈະກາຍເປັນກະທົງທີ່ມີລັກສະນະສາມແຈໜ້າງົວ; ເຊິ່ງໃນກະທົງຈະປະກອບດ້ວຍເຄື່ອງງ່າຍໆດັ່ງນີ້ຄື​ :

1.ເຂົ້າດຳ = ເຮັດຈາກເຂົ້າໜຽວໜຶ້ງສຸກປະສົມງາດຳ(ປັ້ນໃສ່ໃນກະທົງພໍປະມານ)​.​

2.ເຂົ້າແດງ = ເຮັດຈາກເຂົ້າໜຽວໜຶ້ງສຸກປະສົມນຳອ້ອຍ​ແດງ​ ຫລື​ ນ້ຳຕານແດງ(ປັ້ນໃສ່ໃນກະທົງພໍປະມານ).

​3.ເຂົ້າເຫລືອງ = ເຮັດຈາກເຂົ້າໜຽວໜຶ້ງສຸກປະສົມມອນໄຂ່ເປັດ ຫລື​ ໄຂ່ໄກ່​(ປັ້ນໃສ່ໃນກະທົງພໍປະມານ).

4.ເຂົ້າຂາວ = ແມ່ນເຂົ້າໜຽວທີ່ໜຶ່ງສຸກແລ້ວທີ່ເຮົາກິນທົ່ວໄປ​ ໂດຍຈະໃຫ້ຜູ້ອາວຸໂສໃນຄອບຄົວເປັນຜູ້ນຳເອົາເຂົ້າໜຽວທີ່ໜຶ່ງສຸກນີ້ປັ້ນເປັນກ້ອນຈຳນວນ3ກ້ອນນ້ອຍແລ້ວນຳມາຈ້ຳຕາມຮ່າງກາຍຂອງລູກຫລານແຕ່ລະຄົນໃນຄອບຄົວ(ໂດຍຈະຈ້ຳຄົນໜຶ່ງຕໍ່ເຂົ້າ3ກ້ອນ)​ໃນລະຫວ່າງຈ້ຳຜູ້ອາວຸໂສຈະເປັນຄົນກ່າວຄວາມດີຄວາມງາມໃນລັກສະນະຂອງການປັດເປົ່າສິ່ງບໍ່ດີໃຫ້ໝົດໄປນຳປີເກົ່າເຊັ່ນວ່າ​ :

“ອັນໃດບໍ່ດີບໍ່ງາມເຄາະເຂັນເວນຮ້າຍຄວາມອັບປີຈັງໄຮ ຄວາມເຈັບປ່ວຍໄຂ້ອັນໃດກໍ່ຕາມຂໍໃຫ້ໝົດໄປນຳປີເກົ່າ​ ແລະ​ ຕົກໄປຕາມກ້ອນເຂົ້ານີ້ເທີ້ນເພິ່ນຈະກ່າວວ່າດັ່ງນີ້ໃນເວລາຈ້ຳແຕ່ລະຄົນແລ້ວລະຖິ້ມກ້ອນເຂົ້າທັງໝົດລົງໃນກະທົງ.

5.ໃຫ້ແຕ່ລະຄົນໃນຄອບຄົວຕັດເລັບມື, ຕັດເລັບຕີນ ແລະ​ ຕັດປາຍຜົມຂອງຂອງໃຜມັນແລ້ວຫໍ່ໃສ່ເຈ້ຍແລ້ວນຳມາຖິ້ມໃສ່ໃນກະທົງນີ້.

​6.ມີດອກໄມ້1ຄູ່,​ ທຽນ1ຄູ່, ຄຳໝາກ1ຄຳ, ກອກຢາ1ກອກ ແລະ​ ທູບ7ດອກ​ ໃສ່ໃນກະທົງ​ ແລະ​ ເພື່ອໄຕ້ສົ່ງກະທົງ.

7.ໃນຕອນຫົວຄໍ່າກ່ອນມື້ສັງຂານລ່ວງປີໃໝ່ໜຶ່ງມື້ໃຫ້ຜູ້ໃດຜູ້ໜຶ່ງໃນຄອບຄົວເປັນຜູ້ຕາງໜ້ານຳ​ເອົາກະທົງນີ້ໄປຫ້ອຍໄວ້ບໍວິເວນນອກເຮືອນທີ່ສູງພໍປະມານໃນຈຸດທີ່ມີລົມພັດຜ່ານດີ; ໃນລະຫວ່າງທີ່ຈະຫ້ອຍໃຫ້ໄຕ້ທູບ​-ໄຕ້ທຽນແລ້ວກ່າວ​ວ່າ​ :

“ເນື່ອງໃນໂອກາດສົ່ງທ້າຍປີເກົ່າຕ້ອນຮັບປີໃໝ່ລາວນີ້ລູກຫລານທັງຫລາຍໄດ້ສ້າງກະທົງໜ້າງົວນີ້ຂຶ້ນມາເພື່ອປັດເປົ່າຄວາມຊົ່ວຮ້າຍທັງຫລາຍໃຫ້ໝົດໄປນຳປີເກົ່າ ຂໍໃຫ້ນາງສັງຂານທີ່ສະເດັດຜ່ານມາຈົ່ງພັດເອົາຄວາມຊົ່ວຮ້າຍທັງຫລາຍນີ້ໃຫ້ຕົກໄປນຳປີເກົ່າພຸ້ນເທີ້ນ​;

ປີໃໝ່ຈະມາເຖິງແລ້ວຂໍໃຫ້ຄອບຄົວລູກຫລານຈົ່ງມີ​ແຕ່ໂຊກລາບ​ ມີຄວາມສຸກກາຍສະບາຍໃຈ ມີຄວາມສະຫວັດດີມີໄຊ ມີຄວາມອຸດົມສົມບູນຮັ່ງມີ​ ແລະ​ ມີສຸຂະພາບເຂັ້ມແຂງອາຍຸໝັ້ນຂວັນຍືນເທີ້ນ; ກ່າວຈົບແລ້ວໃຫ້ປັກທູບລົງໃນກະທົງແລ້ວຈຶ່ງນຳກະທົງນີ້ຂຶ້ນຫ້ອຍໄວ້​ ໂດຍຈະຫ້ອຍໄວ້ຫັ້ນຈົນກວ່າຫລັງຈາກມື້ສັງຂານຂຶ້ນແລ້ວຈຶ່ງນຳກະທົງນີ້ລົງໄປຖິ້ມກະຕ່າຂີ້ເຫຍື້ອໃນລຳດັບຕໍ່ໄປເວລານຳໄປຖິ້ມຫ້າມຫັນຫລັງກັບເດັດຂາດ.

ທັງໝົດທີ່ກ່າວມານີ້ເປັນປະເພນີຄວາມເຊື່ອມາແຕ່ບູຮານທີ່ບາງທ້ອງຖິ່ນໃນລາວເຮົາ​ຍັງຄົງປະຕິບັດສືບທອດກັນມາເພື່ອປັດເປົ່າເຄາະເຂັນໃຫ້ໝົດໄປນຳປີເກົ່າ ແລະ​ ເພື່ອຮັບໂຊກຮັບຄວາມສະຫວັດດີມີໄຊໃນປີໃໝ່ລາວໃນແຕ່ລະປີ​;

ນີ້ແມ່ນກຸດສະໂລບາຍຂອງຄົນລາວບູຮານເຮົາທີ່ໃຊ້ສັ່ງສອນລູກຫລານໃຫ້ດຳລົງຊີວິດຢ່າງມີສະຕິບົນພື້ນຖານຂອງຄວາມຮຽບງ່າຍ​ແລະປະຢັດມັດທະຍັດຄືຕ້ອງສ້າງຕ້ອງທຳກຳນົດໂຊກຊະຕາຊີວິດດ້ວຍສອງມືຕົນເອງ​ເທົ່ານັ້ນ ແລະ​ ໃຫ້ມີປັນຍາໃນຄວາມເຊື່ອນັ້ນເອງ.

ການແຊຣ໌ຄວາມຮູ້ດີໆຖືວ່າເປັນທັມມະທານຢ່າງໜຶ່ງຂໍ​ຂອບໃຈ​ຂໍ້ມູນ​ ແລ​ະ​ ຮູບພາບໂດຍ : ທ້າວ​ ລັດຖະເທວາ ພຸດທະວົງ.

cr: ວາລະສານເທວາ TAVA Magazine

Related Posts

Leave a Reply

Your email address will not be published. Required fields are marked *