ເມືອງລອງ ສ້າງຂະບວນການ ເກັບຂີ້ເຫຍື້ອ ຕ້ອນຮັບວັນສ້າງຕັ້ງ ຄະນະຊາວໝຸ່ມປະຊາຊົນ ປະຕິວັດລາວ

ຂປລ. ແຫລ່ງຂ່າວຈາກແຂວງຫລວງນໍ້າທາໃຫ້ຮູ້ວ່າ: ເມືອງລອງ ສ້າງຂະບວນການອອກແຮງງານເກັບຂີ້ເຫຍື້ອຕາມເສັ້ນທາງ ພາຍໃນເທສະບານເມືອງ ເພື່ອຂໍ່ານັບຮັບຕ້ອນວັນສ້າງຕັ້ງຄະນະຊາວໝຸ່ມປະຊາຊົນ ປະຕິວັດລາວ ຄົບຮອບ 66 ປີ, ໂດຍການນໍາພາຂອງ ທ່ານ ແກ່ນຈັນ ເຈືອຫລວງແທນ ຄະນະບໍລິຫານງານຊາວໝຸ່ມແຂວງ, ເລຂາຄະນະບໍລິຫານງານຊາວໝຸ່ມເມືອງລອງ,

ມີບັນດາຄະນະບໍລິຫານງານຊາມໝຸ່ມເມືອງ, ເລຂາຄະນະໜ່ວຍຊາວໝຸ່ມອ້ອມຂ້າງເມືອງ, ຕະຫລອດຮອດສະມາຊິກຊາວໝຸ່ມທີ່ມາຈາກສໍານັກງານອົງການຈັດຕັ້ງ, ໂຮງຮຽນ, ໂຮງໝໍ, ລັດວິສາຫະກີດອ້ອມຂ້າງເມືອງເຂົ້າຮ່ວມ 300 ກວ່າຄົນ ໂດຍເລີ່ມເກັບຂີ້ເຫຍື້ອຕາມ 2 ຟາກທາງ ແຕ່ຈຸດໜ້າຫ້ອງວ່າການເມືອງ ໄປຫາຈຸດສີ່ແຍກໂຮງຮຽນມັດທະຍົມສົມບູນເທສະບານເມືອງ ແລະ ຈຸດຕະຫລາດ ມີຄວາມຍາວທັງໝົດ 2 ກິໂລແມັດ ເພື່ອໃຫ້ມີຄວາມສະອາດຈົບງາມ.

ທ່ານ ແກ່ນຈັນ ເຈືອຫລວງແທນ ໄດ້ກ່າວວ່າ: ການອອກແຮງງານໃນຄັ້ງນີ້, ແມ່ນເປັນການສ້າງຂະບວນການຂໍ່ານັບຮັບຕ້ອນວັນສ້າງຕັ້ງຄະນະຊາວໝຸ່ມປະຊາຊົນປະຕິວັດລາວ ຄົບຮອບ 66 ປີ ( 14 ເມສາ 1955 ຫາວັນທີ 14 ເມສາ 2021) ໃຫ້ເປັນຂະບວນການອັນຟົຟື້ນມ່ວນຊື່ນ, ພ້ອມທັງເປັນການປູກຈີດສໍານຶກໃຫ້ແກ່ສະມາຊິກຊາວໝຸ່ມ ໄດ້ຮູ້ຈັກການຮັກສາຄວາມສະອາດ ແລະ ເພື່ອເຮັດໃຫ້ເທສະບານເມືອງມີຄວາມສະອາດງາມຕາ.

ຂ່າວ: ບຸນສີ ໄຊຍະລາດ

Related Posts

Leave a Reply

Your email address will not be published.