ສປປ ລາວ ກຽມສົ່ງອອກງົວ ໄປ ສປ ຈີນ ຊຸດທຳອິດ 3,00 ໂຕ

ສປປ ລາວ ກຽມສົ່ງອອກງົວໄປຍັງ ສປ ຈີນ ຊຸດທຳອິດ ຈຳນວນ 3.000 ໂຕ ຊຶ່ງປັດຈຸບັນພາກສ່ວນກ່ຽວຂ້ອງກຳລັງເລັ່ງປະກອບເອກະສານໃຫ້ສຳເລັດ ເພື່ອໃຫ້ທັນສົ່ງອອກໃນວັນທີ 28 ເມສາຈະເຖິງນີ້.ສຳລັບການສົ່ງອອກງົວໄປ ສປ ຈີນ ລັດຖະບານ ແຫ່ງ ສປປ ລາວ ໄດ້ຕັ້ງເປົ້າໄວ້ແຕ່ນີ້ຮອດປີ 2025 ຈະໃຫ້ສົ່ງງົວອອກໄປຈີນໃຫ້ໄດ້ 200.000 ໂຕຕໍ່ປີ ແລະ ນັບແຕ່ປີ 2025 ເປັນຕົ້ນໄປ ຈະສູ້ຊົນສົ່ງອອກງົວໄປ ສປ ຈີນ ໃຫ້ໄດ້ 500.000 ໂຕຕໍ່ປີ.

ເມື່ອບໍ່ດົນມານີ້ ທ່ານ ລິນຄໍາ ດວງສະຫັວນ ຮອງລັດຖະມົນຕີ ກະຊວງກະສິກໍາ ແລະ ປ່າໄມ້ (ກະຊວງ ກປ) ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຍາມ ແລະ ຊຸກຍູ້ວຽກງານການສົ່ງອອກງົວໄປຕ່າງປະເທດ ຢູ່ສູນກັກກັນພະຍາດສັດ 3 ບໍລິສັດ ຕັ້ງຢູ່ເມືອງສິງ, ແຂວງຫຼວງນໍ້າທາ ໃນການກະກຽມ ສົ່ງງົວອອກໄປ ສປ ຈີນ ຂອງ 3 ບໍລິສັດ ຄື: ບໍລິສັດ ແອວເອັດ, ບໍລິສັດລາວໂກທົງ ແລະ ບໍລິສັດສິບ ສອງປັນນາເຍຫົງ ການຄ້າຈໍາກັດ.

ທ່ານ ຫວາງເຊີນລີ ປະທານກຸ່ມລ້ຽງງົວພັນຊີ້ນ ອໍານວຍການ ບໍລິສັດ ລາວໂກທົງ ໄດ້ລາຍ ງານວ່າ: ໂຄງການສົ່ງອອກງົວພັນຊີ້ນໄປຍັງ ສປ ຈີນ ໄດ້ສ້າງຕັ້ງສູນກັກກັນພະຍາດສັດ ຢູ່ເມືອງສິງ ມາ ເຖິງປັດຈຸບັນເປັນເວລາ 4 ປີ ເຫັນວ່າມີຄວາມພ້ອມຫຼາຍດ້ານ, ປັດຈຸບັນພວມກະກຽມນໍາງົວສົ່ງ ອອກຊຸດທໍາອິດ ຈໍານວນ 3.000 ໂຕ ອອກໄປ ສປ ຈີນ ຊຶ່ງບໍລິສັດຈະໄດ້ເລັ່ງປະກອບເອກະສານ ໃຫ້ສໍາເລັດໂດຍໄວ ຕາມລະບຽບກົດໝາຍຂອງ ສປປ ລາວ, ສະມາຄົມງົວພັນຊີ້ນ ໄດ້ນໍາພາບໍລິສັດ ປະສານສົມທົບກັບພາກສ່ວນທີ່ກ່ຽວຂ້ອງຂອງລາວ ເພື່ອກະກຽມຈັດພິທີເປີດການສົ່ງງົວພັນຊີ້ນ ໄປປະ ເທດຈີນຢ່າງເປັນທາງການໃນວັນທີ 28 ເມສາ ນີ້.

ທ່ານ ລິນຄໍາ ດວງສະຫັວນ ໄດ້ສະແດງຄວາມຊົມເຊີຍຕໍ່ໂຄງການດັ່ງກ່າວ ທີ່ເປັນຂີດໝາຍທີ່ດີໃນ ການສົ່ງງົວອອກໄປ ສປ ຈີນ ຕາມແນວທາງຂອງລັດຖະບານວາງໄວ້, ລັດຖະບານໄດ້ກໍານົດໄວ້ ແຕ່ນີ້ຮອດປີ 2025 ສູ້ຊົນສົ່ງງົວອອກໄປ ສປ ຈີນ ໃຫ້ໄດ້ 200.000 ໂຕ ຕໍ່ປີ, ໂດຍເບື້ອງຕົ້ນແມ່ນຈະ ສູ້ຊົນສົ່ງງົວອອກໃຫ້ໄດ້ 50.000 ໂຕຂຶ້ນໄປຕໍ່ປີ ແລະ ໄດ້ເນັ້ນໜັກໃຫ້ຜູ້ປະກອບການຮ່ວມມືກັນ ໃນການສົ່ງອອກງົວໃຫ້ໄດ້ຕາມເປົ້າໝາຍ ໂດຍເນັ້ນໃສ່ໃຫ້ໄດ້ຕາມມາດຕະຖານທີ່ກໍານົດໄວ້, ຫຼຸດຜ່ອນ ການນໍາເຂົ້າ, ສົ່ງເສີມໃຫ້ປະຊາຊົນພາຍໃນປະເທດລ້ຽງສັດໃຫ້ຫຼາຍຂຶ້ນ, ປະສານງານຝ່າຍລາວ ແລະ ຈີນ ໃນການສົ່ງອອກໃຫ້ສະດວກ, ຫຼຸດຜ່ອນຂໍ້ຫຍຸ້ງຍາກຜ່ານຫຼາຍຂັ້ນຕອນໃນການສົ່ງອອກ.

(ຂ່າວ-ພາບ: ມຸນຕີ)

ປະຊາຊົນ

Related Posts

Leave a Reply

Your email address will not be published. Required fields are marked *