ເຈົ້າແຂວງຈຳປາສັກ ພ້ອມຄະນະ ຕິດຕາມຊຸກຍູ້ໂຄງການກໍ່ສ້າງ ດ່ານສາກົນວັງເຕົ່າ

ສືບເນື່ອງຈາກກອງປະຊຸມປຶກສາຫາລື ແຜນທີ່ຈະສືບຕໍ່ການຈັດຕັ້ງປະຕິບັດໂຄງການ ກໍ່ສ້າງດ່ານສາກົນວັງເຕົ່າ ເມືອງໂພນທອງ ແຂວງຈຳປາສັກ ໃຫ້ເປັນດ່ານສາກົນທີ່ທັນສະໄໝ ໃນວັນທີ 24 ກຸມພາ ຜ່ານມາ ໂດຍມີທ່ານເຈົ້າແຂວງຈຳປາສັກ ແລະທ່ານຮອງລັດຖະມົນຕີກະຊວງໂຍທາທິການ ແລະ ຂົນສົ່ງ ແລະ ມີຜູ້ຕາງໜ້າຈາກ ກະຊວງ, ພະແນກການທີ່ກ່ຽວຂ້ອງຂອງ ແລະ ເນື້ອໃນກອງປະຊຸມແມ່ນ ເຫັນດີໃຫ້ສືບຕໍ່ໂຄງການກໍ່ສ້າງດັ່ງກ່າວ, ເຊິ່ງຜູ້ຮັບເໝົາ ບໍລິສັດພົງຊັບທະວີກໍ່ສ້າງ ກໍ່ເຫັນດີເປັນເອກະພາບ ຈະສືບຕໍ່ກໍ່ສ້າງໂຄງການດັ່ງກ່າວ ເລີ້ມແຕ່ຕົ້ນເດືອນທີ ມີນາ 2021 ແລະ ໃຫ້ສໍາເລັດພາຍໃນປີ 2022.

ໃນວັນທີ 7 ເມສາ 2021, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ພ້ອມຄະນະ ໄດ້ລົງຕິດຕາມຊຸກຍູ້ໂຄງການກໍ່ສ້າງດັ່ງກ່າວ, ເບິ່ງສະຖານທີ່ ແລະ ຈຸດໜ້າວຽກຈະຕ້ອງໄດ້ສືບຕໍ່ໃນການກໍ່ສ້າງ. ພ້ອມທັງຊີ້ນຳໃຫ້ ຄະນະກໍາມະການຂັ້ນແຂວງ ລົງກວດກາໜ້າວຽກທີ່ຜູ້ຮັບເໝົາປະຕິບັດສໍາເລັດແລ້ວ, ໜ້າວຽກທີ່ຍັງຄ້າງ ແລະ ກວດກາຄືນບັນດາໜ້າວຽກທີ່ມີການເປ່ເຟ ແລ້ວສັງລວມມູນຄ່າທັງໝົດເພື່ລາຍງານແຂວງ ພາຍຫລັງປະເມີນມູນຄ່າເປັນທີ່ຮຽບຮ້ອຍແລ້ວ ໃຫ້ເຈົ້າຂອງໂຄງການຄົ້ນ ຄວ້າສັນຍາຄືນໃໝ່. ໂຄງການກໍ່ສ້າງດ່ານສາກົນວັງເຕົ່າ ໃຫ້ເປັນດ່ານສາກົນທີ່ທັນສະໄໝ, ໄດ້ຮັບການຈັດຕັ້ງປະ ຕິບັດ ມາແຕ່ຕົ້ນ ປີ 2013 ມີມູນຄ່າກໍ່ສ້າງໂຄງການ 98,3 ຕື້ກີບ ໂດຍແມ່ນພະແນກໂຍທາທິການ ແລະ ຂົນສົ່ງແຂວງຈຳປາສັກ ເປັນເຈົ້າຂອງໂຄງການ ແລະ ບໍລິສັດ ພົງຊັບທະວີ ເປັນຜູ້ຮັບເໝົາກໍ່ສ້າງ ກ່ຽວກັບການຈັດຕັ້ງປະຕິບັດບັນດາໜ້າວຽກຕ່າງໆຂອງໂຄງການ ແລະ ຄວາມຄືບໜ້າລ້າສຸດຂອງໂຄງການແມ່ນປະຕິບັດໄດ້ 82,96%.

ປັດຈຸບັນ ການກະກຽມວຽກງານຢູ່ພາກສະໜາມຜູ້ຮັບເໝົາ ແມ່ນໄດ້ໃຫ້ທີມງານວິຊາການລົງໄປສຳຫລວດວຽກໄຟຟ້າໃນອາຄານ, ວຽກກໍ່ສ້າງທາງຂາອອກ, ວຽກກໍ່ສ້າງອາຄານປີກເບື້ອງຂາອອກ ເພື່ອປະເມີນຄືນບັນດາໜ້າວຽກຕ່າງໆ ແລະ ກະກຽມກົນຈັກ,ອຸປະ ກອນຕ່າງໆ ເຄື່ອນຢ້າຍເຂົ້າສູ່ສະໜາມເພື່ອກະກຽມລົງມືກໍ່ສ້າງ ແລະ ຜູ້ຮັບເໝົາໄດ້ຢືນຢັນຕໍ່ເຈົ້າຂອງໂຄງການວ່າ ພາຍຫລັງໄດ້ຮັບອະນຸມັດເງິນກູ້ຈະຮີບຮ້ອນລົງມືຈັດຕັ້ງປະຕິບັດວຽກງານຂອງຕົນ ໃຫ້ສຳເລັດຕາມແຜນການ ແມ່ນເລີ່ມສືບຕໍ່ລົງມື ແຕ່ຕົ້ນເດືອນ ມີນາ 2021 ແລະ ໃຫ້ສໍາເລັດພາຍໃນປີ 2022.

ໂອກາດນີ້, ທ່ານເຈົ້າແຂວງຈຳປາສັກ ພ້ອມຄະນະ ຍັງໄດ້ຕິດຕາມກວດກາ ສະພາບຝຸ່ນໄງ່ ຈາກລ້ານມັນຕົ້ນ ບໍລິເວນເຂດເສດຖະກິດພິເສດວັງເຕົ່າ ທີ່ສົ່ງຜົນກະທົບຕໍ່ສຸຂະພາບ ແລະ ການດຳ ລົງຊີວິດ ຂອງປະຊາຊົນ ບໍລິເວນດັ່ງກ່າວ ເພື່ອຫາທິດທາງແກ້ໄຂໃນຕໍ່ໜ້າ.

Related Posts

Leave a Reply

Your email address will not be published. Required fields are marked *