ສະຫລອງ​ປີ​ໃໝ່​ບົນ​ຈິດ​ໃຈ​ປະຢັດ

​ໃນ​ໂອກາດ​ກອງ​ປະຊຸມ​ຄັ້ງປະຖົມ​ມະ​ລືກ​ຂອງ​ສະພາ​ແຫ່ງ​ຊາດ​ຊຸດ​ທີ IX ທ່ານ​ນາຍົກລັດຖະມົນຕີ ພັນ​ຄຳ ວິພາ​ວັນ ​ໄດ້​ມີ​ຄຳ​ເຫັນ​ເຈາະ​ຈີ້ມ​ໃສ່​ຮ່າງ​ບົດ​ລາຍ​ງານ​ແຜນ​ພັດທະນາ​ເສດຖະກິດ-ສັງຄົມ 5 ປີ​ຂອງ​ລັດຖະບານ​ຊຸດ​ທີ IX ກໍ​ຄື​ມີ​ຄຳ​ເຫັນ​ຕອບ​ຄຳ​ຊັກ​ຖາມ​ຂອງ​ຜູ້​ແທນ​ສະພາ ​ເຊິ່ງບາງ​ຕອນ​ທ່ານ​ໄດ້​ກ່າວ​ວ່າ: “ພວກ​ເຮົາ​ຢາກ​ຮັ່ງ​ແຕ່​ພັດ​ຍັງ​ພາກັນ​ຟຸມ​ເຟືອຍ, ​ໄດ້ຫ້າ​ກິນ​ສິບ ​ເຮັດ​ແນວ​ໃດ​ມັນ​ຊິ​ຮັ່ງ”. ສຸພາສິດ​ບູຮານ​ເວົ້າວ່າ:

ນ້ຳພຽງໃດດອກບົວພຽງນັ້ນ, ແຕ່ພວກເຮົາພັດພາກັນຂີ່ລົດຫລູຫລາ, ອີ່ຫຍັງ, ອີ່ຫຍັງກະມີ ແລະ ຍັງມີປະໂຫຍກທີ່ເດັດອື່ນໆອີກຫລາຍປະໂຫຍກທີ່ທ່ານໄດ້ຍົກເອົາມາເປັນຕົວຢ່າງໃນການຟຸມເຟືອຍ.

ເພາະສະນັ້ນ ມີແຕ່ພ້ອມກັນປະຢັດ ໃນອະນາຄົດຕໍ່ໜ້າພວກເຮົາຈຶ່ງຈະມີຢູ່ມີກິນ ແລະ ອຸດົມຮັ່ງມີ. ໃນປະຫວັດສາດຜ່ານມາ ຜູ້ນຳແຕ່ລະລຸ້ນຄົນ ບໍ່ວ່າຢູ່ໃນປະເທດ ຫລື ປະເທດເພື່ອນມິດທີ່ເຄີຍຕໍ່ສູ້ຮ່ວມສຸກຮ່ວມທຸກນຳກັນມາ ເພິ່ນກໍເຄີຍກຳຊັບສັ່ງສອນພວກເຮົາມາຕະຫລອດເຊັ່ນ: ປະທານ ໂຮ່ຈີມິນ ໄດ້ເວົ້າວ່າ: ຄວາມບໍ່ປະຢັດມັນກໍແມ່ນການຟຸມເຟືອຍ.

ການຟຸມເຟືອຍມີຫລາຍປະເພດ ຕົວຢ່າງຟຸມເຟືອຍກຳລັງແຮງງານ, ຟຸມເຟືອຍເວລາ ແລະ ຟຸມເຟືອຍຊັບສິນເງິນທອງ ເຊິ່ງໃນການຟຸມເຟືອຍແຕ່ລະຢ່າງນັ້ນມັນກໍມີປັດໄຈໄຈ້ແຍກຫລາຍບັນຫາກິໆກີໆຈົນທິດກໍ່າບໍ່ສາມາດເອົາມາລົງໃນບົດນີ້ໄດ້ ເພາະຄໍລຳມີຈຳກັດ. ສ່ວນຜູ້ນຳຢູ່ປະເທດເຮົາກໍຍັງມີຫລາຍທ່ານເຮັດເປັນຕົວຢ່າງມາແລ້ວ ເປັນຕົ້ນໃນລັດຖະບານຊຸດທີ VIII ຍຸກຂອງທ່ານ ທອງລຸນ ສີສຸລິດ ເປັນນາຍົກລັດຖະມົນຕີ ຈົນໄດ້ອອກມາດຕະການເປັນຄຳສັ່ງກ່ຽວກັບການປະຢັດ ເຊິ່ງໃນນີ້ທ່ານເອງ ແລະ ບັນດາທ່ານໃນກົມການເມືອງຫລາຍທ່ານໄດ້ສະຫລະລົດປະຈຳຕຳແໜ່ງທີ່ມີລາຄາແພງຫລູຫລາ ເພື່ອປະມູນອອກຂາຍໄດ້ເງິນເຖິງ 11 ກວ່າຕື້ກີບ ມອບເຂົ້າລັດ. ນີ້ຄືແບບຢ່າງທີ່ຫາຍາກໃນບັນດາຜູ້ນຳໃນຍຸກເສດຖະກິດມີການເຟື້ອງຟູ.

ພໍ​ມາ​ເຖິງ​ຍຸກ​ລັດຖະບານ​ໃໝ່​ອ່ຽມຊຸດ​ທີ IX ກະ​ແສ​ທີ່​ສົ່ງ​ຜົນ​ໃຫ້​ທຸກ​ຄົນ​ປະຢັດ​ແມ່ນ​ພວມ​ຈະ​ຖືກ​ຈັດຕັ້ງປະຕິບັດ​ຢ່າງ​ແຂງ​ແຮງ, ​ໃນ​ຂັ້ນຕໍ່​ໄປ​ອາດ​ກາຍ​ເປັນ​ວາລະ​ແຫ່ງ​ຊາດ​ໃນ​ການ​ບຸກທະລຸ​ເຂົ້າສູ່​ວິທີ​ການ​ແກ້​ໄຂ​ບັນຫາ​ວິ​ກິດ​ທາງ​ດ້ານ​ການ​ເງິນ​ຂອງ​ປະ​ເທດ​ທີ່​ພວມ​ປະສົບ​ບັນຫາ.

ສະຫລອງປີໃໝ່ບົນຈິດໃຈປະຢັດມັດທະຍັດ ເພາະສະນັ້ນ ຈຶ່ງຖືວ່າໃນໂອກາດການສະຫລອງສົ່ງທ້າຍປີເກົ່າ 2563 ຕ້ອນຮັບປີໃໝ່ 2564 ຈຶ່ງຂໍໃຫ້ພວກເຮົາທຸກຄົນ, ທຸກພາກສ່ວນ ແລະ ທຸກການຈັດຕັ້ງທາງສັງຄົມ ບໍ່ວ່າພາກລັດ ແລະ ພາກເອກະຊົນ ຈົ່ງເບີກບານມ່ວນຊື່ນ ໄປຄຽງຄູ່ກັບການປະຢັດມັດທະຍັດຢ່າງເຄັ່ງຂັດ.

ການປະຢັດມັດທະຍັດໃນຊ່ວງສະຫລອງປີໃໝ່ນີ້ ມັນກໍໝາຍເຖິງກິນໃຫ້ອີ່ມພຽງພໍ, ບໍ່ເຮັດຟຸມເຟືອຍເຫລືອຢູ່ເຫລືອກິນເກີນຄວາມເຫັນແກ່ປາກ ຄວາມຢາກແກ່ທ້ອງ, ປະຕິບັດໂມງເວລາທີ່ທາງການເພິ່ນອະນຸມັດ, ບໍ່ຢູ່ເດິກຢູ່ດື່ນ, ບໍ່ເປີດເພງດັງລົບກວນຊາວບ້ານ, ການຫົດການສົງກັນຕ້ອງດ້ວຍເອົານ້ຳອົບນ້ຳຫອມ ຈຶ່ງເປັນສິລິມຸງຄຸນ. ພິເສດ ແລະ ສຳຄັນທີ່ສຸດ ຄືເມົາບໍ່ຂັບ-ຂັບບໍ່ເມົາ.

ເວົ້າໂດຍລວມແລ້ວ ການສະເຫລີມສະຫລອງສົ່ງທ້າຍປີເກົ່າ ຕ້ອນຮັບປີໃໝ່ນີ້ ຕ້ອງໃຫ້ມີຄວາມສະຫງົບປອດໄພໃນຊີວິດ ແລະ ຊັບສິນໃຫ້ໜ້ອຍສຸດ ຫລືວ່າ ມີຄວາມປອດໄພຮ້ອຍສ່ວນຮ້ອຍຈຶ່ງຖືວ່າພວກເຮົາມີໂຊກມີໄຊ, ໄດ້ຮີດ 12 ຄອງ 14 ຮີດຍີ່ຄອງຈຽງຢ່າງແທ້ຈິງ ທັງຮັກສາໄດ້ປະເພນີວັດທະນະທຳອັນດີງາມຂອງຊາດ.

​ເວົ້າ​ໄດ້​ວ່າ​ປີ​ນີ້​ເປັນ​ປີ​ພິ​ເສດ ຍ້ອນ​ວ່າ​ພວກ​ເຮົາ​ໄດ້​ຜູ້ນຳ​ສູງ​ສຸດ​ຂອງ​ປະ​ເທດ​ເປັນ​ຜູ້ນຳ​ທີ່​ມີ​ຄວາມ​ຮູ້​, ທຸກ​ທ່ານ​ທຸກ​ຄົນ​ລ້ວນ​ແລ້ວ​ແຕ່​ເປັນ​ປັນຍາ​ຊົນ ​ແລະ ​ເປັນ​ຜູ້ນຳ​ທີ່​ມີ​ທັກ​ສະ, ຄວາມ​ສາມາດ, ມີ​ວິ​ໄສ​ທັດ​ອັນ​ກວ້າງ​ໄກ ​ແລະ ​ເດັດຂາດ​ຈິງ​ຈັງ ​ເຊິ່ງມາ​ຮອດ​ປັດຈຸບັນ ຫລາຍ​ທ່ານ​ຫລາຍ​ສະຫາຍ​ໄດ້​ກາຍ​ເປັນ​ຜູ້ນຳ​ຂວັນ​ໃຈ​ປະຊາຊົນ ທັງ​ປະຊາຊົນ​ກໍ​ມີ​ຄວາມ​ເຊື່ອ​ໝັ້ນຕໍ່​ການ​ນຳພາ​ປະ​ເທດ​ຊາດ ​ແລະ ປະຊາຊົນ​ກ້າວ​ໄປ​ສູ່​ຈຸດ​ທີ່​ໝາຍ​ໄດ້​ດັ່ງ​ສົມ​ປະສົງ. ​ໂອກາດ​ປີ​ໃໝ່​ລາວ 2564

ບັນດາ​ເອື້ອຍອ້າຍ​ນ້ອງ​ພະນັກງານ​ທຸກ​ຄົນ​ໃນ​ໜັງສືພິມ ລາວ​ພັດທະນາ ຂໍ​ອວຍພອນ​ໄຊ​ໃຫ້ການ​ນຳ​ພັກ-ລັດ​ຈົ່ງ​ໝັ້ນຍືນ​ເຂັ້ມ​ແຂງ ນຳພາ​ຊາດ​ບ້ານ​ເມືອງ​ກ້າວ​ຂຶ້ນສູ່​ຄວາມ​ຈະ​ເລີ​ນຮຸ່ງ​ເຮືອງ​ຢ່າງ​ບໍ່​ຢຸດ​ຢັ້ງ. ອວຍພອນ​ເພື່ອນ​ມິດ​ຜູ້​ຕິດຕາມ​ຂ່າວ​ຄາວ​ຈາກ​ໜັງສືພິມ​ ລາວ​ພັດທະນາ ຈົ່ງ​ມີ​ໂຊກ​ມີ​ໄຊ​ຕະຫລອດ​ປີ​ໃໝ່ ​ແລະ ອວຍພອນ​ປວງ​ຊົນ​ລາວ​ທັງ​ຊາດ​ຈົ່ງ​ໝັ້ນຍືນ​ເຂັ້ມ​ແຂງ. ພິ​ເສດ​ຕ້ອງ​ຍາດ​ເອົາ​ໄຊຊະນະ​ໃນ​ການ​ຕ້ານ​ພະຍາດ​ໂຄ​ວິດ-19 ​ແລະ ພະຍັນຕະລາຍ​ຕ່າງໆ​ໄດ້​ຢ່າງ​ສິ້ນ​ເຊີງ.

Related Posts

Leave a Reply

Your email address will not be published. Required fields are marked *