ອົງການປົກຄອງນະຄອນຫລວງວຽງຈັນ ຮ່ວມກັບເຈົ້າສັດທາ ຈັດພິທີຫົດສົງ ພະເຈົ້າອົງຄຳ

ອົງການປົກຄອງນະຄອນຫລວງວຽງຈັນຮ່ວມກັບເຈົ້າສັດທາ ຈັດພິທີຫົດສົງ ພະເຈົ້າອົງຄຳ.

ໃນວັນທີ 14 ເມສາ 2021 ເປັນມື້ທຳອິດ ຂອງການສະເຫລີມສະຫລອງບຸນປີໃໝ່ລາວ ພສ 2564, ອົງການປົກຄອງນະຄອນຫລວງວຽງຈັນ(ນວ), ແນວລາວສ້າງຊາດ ນວ, ພະແນກຖະແຫລງຂ່າວວັດທະນະທຳ ແລະ ທ່ອງທ່ຽວນະຄອນຫລວງວຽງຈັນ(ຖວທ) ຮ່ວມກັບ ບໍລິສັດ ເພັດບັນດິດກໍ່ສ້າງ ຈຳກັດ, ພ້ອມດ້ວຍອຳນາດການປົກຄອງເມືອງໄຊເສດຖາ ແລະ ພາກສ່ວນກ່ຽວຂ້ອງ ໄດ້ຈັດພິທີຫົດສົງ ພະພຸດທະສຸວັນນະສາທານ ທັມມິກະຣາດ(ພຣະເຈົ້າອົງຄຳ) ຢູ່ກົມມະລຽນພະທາດຫລວງວຽງຈັນ.

ໂດຍມີ ທ່ານ ນາງ ນາລີ ສີສຸລິດ ພັນລະຍາປະທານປະເທດແຫ່ງ ສປປ ລາວ, ທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫລວງວຽງຈັນ, ມີບັນດາພະສົງ, ເຈົ້າສັດທາ ແລະ ມວນຊົນເຂົ້າຮ່ວມຈຳນວນໜຶ່ງ.

ທ່ານ ນາງ ບົວວຽງ ເພັດທະລານຄຳ ປະທານບໍລິສັດເພັດບັນດິດ ກໍ່ສ້າງຈຳກັດ ໃນນາມເຈົ້າສັດທາໃນພິທີ ໄດ້ໃຫ້ສຳພາດວ່າ: ການຈັດພິທີຫົດສົງ ພຣະເຈົ້າອົງຄຳ ໃນໂອກາດປີໃໝ່ລາວ ຈະເປັນປະເພນີປະຕິບັດ ໃນແຕ່ລະປີ ແລະ ໃນປີ ພສ 2564 ນີ້, ພວກເຮົາໄດ້ມີການປຶກສາຫາລືກັບພາກສ່ວນກ່ຽວຂ້ອງ ກໍຄື ຄະນະອົງການພຸດທະນາສະໜາສຳພັນລາວ ແລະ ພະແນກ ຖວທສວຍ ນະຄອນຫລວງວຽງຈັນ

ຈັດພິທີບູຊາລຸກຂະເທວະດາ, ເຈົ້າຖິ່ນເຈົ້າຖານ, ສິ່ງສັກກາລະບູຊາ ເຂດມໍລະດົກພະທາດຫລວງ ແລະ ອັງເຊີນ ພຣະເຈົ້າອົງຄໍາ ລົງສູ່ແທ່ນຫົດສົງ ແລະ ດ້ວຍນໍ້າຫອມ ທີ່ເຮັດມາຈາກນໍ້າສ້າງ 9 ວັດ ເພື່ອເປັນສິລິມຸງຄຸງແກ່ປະເທດຊາດບ້ານເມືອງ, ເຊິ່ງໃນປີນີ້ ແມ່ນເຮັດເອົາຮີດເອົາຄອງ, ຈັດແບບກະທັດຮັດ,

ຈຳກັດຈຳນວນຄົນເຂົ້າຮ່ວມ, ໃສ່ຜ້າອັດປາກ-ດັງ ໂດຍປະຕິບັດຕາມມາດຕະການປ້ອງກັນການລະບາດຂອງພະຍາດໂຄວິດ-19.

ຂ່າວ: ວີລະວັນ

ພາບ: ອ່າຍຄຳ

Related Posts

Leave a Reply

Your email address will not be published. Required fields are marked *